Чираттагы җиңү безнеке булырмы?

Хәбәр иткәнебезчә, Россия эстрадасының сигез суперйолдызы, «Битва хоров» проектында катнашыр өчен, сигез шәһәрдән иң яхшы җырчыларны туплады. Проектта Мәскәү, Петербург, Казан, Түбән Новгород, Саратов, Екатеринбург, Новосибирск һәм Волгоград катнаша. Тавыш бирүчеләрнең саны аз булганлыктан, Мәскәү белән Түбән Новгород инде төшеп тә калды. Ә безнекеләр соңгы чыгарылышта 5 нче урынга төште. Димәк, безнекеләр өчен тавыш бирүчеләр алай күп түгел. Якшәмбе көнне сәгать 18.25тә турыдан-туры эфир вакытында казанлылар өчен тавыш бирергә онытмыйк. «Битва хоров»та җиңгән хор иң яхшы хор исемен алачак. Ә бу исә, хорда катнашучылар өчен генә түгел, Казаныбыз өчен дә чираттагы җиңүләрнең берсе булачак.