Кыш бабайда кунакта, яки Яңа ел каникулында кайда ял итәргә?

Авылга - чана шуарга

Соңгы елларда республикада агротуризм популярлаша бара. Әлеге өлкәдә уңышлы гына эшләп килгән Биектау районының Ямаширмә авылы фермеры Габделәхмәт Котдусовка шалтыраттык.
- Без кунакларга кызык­лы бик күп чаралар тәкъдим итәбез. Махсус тау ясап куйдык, аннан чана белән шуалар, иң ерак шуучы бәйгесендә җиңүчегә бүләк тә бирәбез. Шугалак бар, әмма тимераякларны үзегезгә алып киләсе була. Балык тотарга да була, күлгә карп белән кәрәкә җибәргән идек. Авыл буйлап чаналарда йөртәчәкбез. Без­нең белән Кыш бабай һәм Кар кызы да булачак. Мини-зоопаркыбызда ат, аккош, ишәк, тәвә, каз, әтәч, тавыклар яши. Кафе, кунак йортын да төзеп куйдык. 1 декабрьдән кышкы программа эшли башлады, - диде ул.
Авыл Казаннан кырык чакрым ераклыкта урнашкан. Өч яшькә кадәрге балаларга керү - бушка, 3-18 яшьлекләргә - 150, олыларга - 200 сум. Мәктәптән экскурсиягә килгәндә - 170 сум, бу бәягә коймак белән чәй эчү дә кергән.

Яшел Үзән районының ачык һавадагы этномузее да Яңа ел бәйрәмнәренә туристларны каршы алырга җыена. Казаннан илле чакрым ераклыкта урнашкан музейда шулай ук мини-зоо­парк эшли, кунаклар өчен 15 минутлык сценарий төзеп, күңел ачу программасы тәкъдим итмәкчеләр.
- Чанада йөрү, мастер-класслар оештырабыз. Бәясенә килгәндә, керү билеты балаларга - 100, олыларга - 200 сум, - ди музей директоры Дамир Камалетдинов.

Кыш бабайда кунакта

Яңа ел Кыш бабай белән Кар кызыннан башка узмый. Ә алар Арча районының Яңа Кырлай авылында яши. Кыш бабай резиденциясе 5 декабрьдән 25 гыйнварга кадәр эшләячәк. Биредә сезне татар фольклоры һәм татар әкиятләре персонажлары катнашында интерактив уен, Кыш бабайның йокы бүлмәсе белән танышу, Наҗия ападан мастер-класс, Яңа ел бүләге һәм төрелгән грамота көтә.
- Резиденция территориясендә тауда шуарга, атта йөрергә була. Программа рус телендә була, заказ булса, татарча да тәкъдим итәбез, - дип хәбәр иттеләр безгә резиденциядән.

Бәяләре: резиденция автобусларында килүчеләргә - 2-7 яшьлекләргә - 1400 сум, мәктәп укучыларына - 1900 сум, олыларга - 2150 сум (автобуслар «Татарстан» кунакханәсеннән сәгать 9.00да һәм 11.00дә кузгала).
Үз транспортларында килүчеләргә - 2-7 яшьлекләргә - 1050 сум, мәктәп укучыларына - 1550 сум, олыларга - 1800 сум. Төшке аш кирәк булса, 200 сумны аерым түлисе.

Музейга - Кыш бабай рецепты буенча лимонад ясарга

Интеллектуаль ялны өстен күрүчеләрне музейларга чакырабыз. Туризм комитетыннан алынган мәгълүматларга караганда, татарстанлыларны һәм башкала кунакларын бик күп кызыклы чаралар көтә. Республиканың Милли музеенда безгә 2-10 гыйнвар көннәрендә балалар өчен чыршы бәйрәме уздырылачак. Анда керү билеты - 350 сум, бүләк тә аласың килсә - 500 сум. Биредә балалар музей Патшабикәсе белән маҗаралы сәяхәткә «чыгып китә». Сәяхәт барышында алар, төрле сынау­ларны үтеп, Кыш бабайның борынгы сандыгында яткан тылсымлы әйберләрне эзләячәкләр. Кыш бабайның остаханәсендә бәйрәм открыткалары, сувенирлар һәм кар бөртекләре ясарга өйрәнәчәкләр.

2-7 гыйнвар көннәрендә Зөя шәһәрчеге музеенда «Зөя уеннары» дигән программа тәкъдим итәләр. 30 минутлык программага элеккеге уеннар, кызыклы биюләр, такмаклар җырлау кергән. Олылар өчен билет - 200, пенсионер, студент, мәктәп укучыларына - 150 сум.

Болгар музей-тыюлыгына баручылар театраль­ләштерелгән «Кышкы оч­рашулар» программасын күрә ала.
Алабугада 30 декабрьдән алып 10 гыйнварга кадәр «Яңа ел уенчыгы» бәйрәм чарасында төрле мастер-класслар алырга, осталардан Яңа ел уенчыгы ясарга өйрәнеп була. Билет бәясе - 200 сум. «Яшәгән ди, булган ди...», «Әкият терапиясе» һәм башка тамашалар - 400 сум.

«Казан Кремле» музей-тыюлыгына «Кыш бабайның фәнни лабораториясе» урнашачак. 14 декабрьдән 10 гыйнварга кадәр барачак программа кысаларында, кечкенә кар бөртегеннән зуррагын ясарга, карны төрле төскә кертергә, Кыш бабай рецепты буенча лимонад эшләргә өйрәтәчәкләр. Билет бәясе - 400 сум.

Шугалак
Спорт яратучыларны «Казан» таудан чаңгы шуу комплексында көтеп калалар. Йә булмаса шугалакларга барырга мөмкин. Быел аларның саны узган елгыдан ким булмаячак. «Казан-Арена» янындагысы - иң зурысы. Шуның өстенә, ул бушлай да. Тимераякларны прокатка алырга мөмкин.
«Әкият» курчак театры каршында боз шәһәрчеге төзеләчәк. Анда понида йөрергә һәм таудан шуарга барырга була.
Казанда каникулда барысы 18 шугалак, 9 ябык боз аренасы, шулай ук ачык шугалаклар эше оештырыла. Горький исемендәге паркта, Бертуган Касыймовлар урамы буенча урнашкан урман массивында, Нагорныйдагы каенлыкта, шулай ук Юдино һәм Чебокса торак массивларында яктыртылган чаңгы трассалары, шулай ук 8 чаңгы базасы эшләячәк. Прокатка чаңгы алу - якынча 120 сумнан 150 сумга кадәр (бер сәгатькә).

Балачак иленә сәяхәт
2-9 гыйнвар көннәрендә танылган спортчы Мария Киселева төшләр иленә сәяхәткә чакыра. Шул исемдәге тамаша Су спорты төрләре сараенда көненә өч тапкыр куела. Билет бәяләре - 500 сумнан 1200 сумга кадәр.

Маҗаралар шуның белән генә бетми әле, 7 гыйнварда Казанга Европа сабын куыклары театры килә. Сабый бала өреп ясаган куыклар белән олы кеше кереп утырырлык сабын куык­ларын «Волшебная планета пузырей» шоуында күрергә мөмкин. Химиклар мәдәният сараенда узачак әлеге тамашага билет бәяләре - 300 сумнан 1000 сумга кадәр.

2-6 гыйнварда бертуган Запашныйлар Зур Мәскәү циркы белән бергә үз программаларын тәкъдим итәчәк.

Яңа ел ярминкәсе эшләячәк
25 декабрьдән 10 гыйнварга кадәр Казанның Иске татар бистәсендә Яңа ел ярминкәсе эшләячәк. Былтыр анда беренче тапкыр чыршы да куйганнар иде. Яңа ел базарының форматы узган елгы кебек булыр дип көтелә. Анда сувенир продукцияләр, чыршы уенчыклары сатылачак. Халык һөнәрчеләренең эшләрен дә күрергә мөмкин. Милли ризыклар белән чәй сату да оештырылачак. Шунда ук шугалак та барлыкка киләчәк.
Шәһәрнең төп чыршылары Иске татар бистәсендә, Меңьеллык паркында һәм «Әкият» курчак театры каршындагы мәйданчыкка куелачак.