Шәһри Казан

Минтимер Шәймиев: «Минем белән эшләргә туры килгәннәрнең барысына да рәхмәт әйтәсем килә»

Татарстан Дәүләт киңәшчесе Минтимер Шәймиев кичә үзенең 80 яшьлек юбилеена багышланган концерт кунакларына "Пирамида" комплексы сәхнәсеннән торып мөрәҗәгать итте.

"Язмыш ихтыяры белән үземнең 80 яшемдә бу сәхнәдә сезнең каршыда торам. Мин, Татарстан Республикасы белән катлаулы, хәлиткеч елларда җитәкчелек иткән кеше буларак, безнең кадерле халкыбыз алдында җавап тотарга кирәк буласын һәрвакыт яхшы аңладым. Үзгәрешләр чоры булган 90 нчы елларда дәүләт суверенитеты турында Декларация кабул иттек. Без өстебезгә бик зур җаваплылык алдык һәм ышанычны акларга тиеш булдык. Ул чакта нәрсәләр аша узасын белмәгән идек. Әмма вакыт үзенекен итте, һәм бүген барысы да республиканың үсешенә уңай бәя бирә", - дип, Минтимер Шәймиев сүзләрен китерә Татарстан Президенты матбугат хезмәте.

Дәүләт киңәшчесе сүзләренчә, Татарстан чирек гасыр эчендә Россиянең иң уңышлы үсештәге төбәкләренең берсенә, "уңышка мәҗбүр ителгән" республикага әверелде. Татарстан актив рәвештә үсешен дәвам иттерә, һәм монысы - республиканың хәзерге Президенты Рөстәм Миңнеханов һәм аның командасы казанышы, дип билгеләп үтте Минтимер Шәймиев.

"Минем белән эшләргә туры килгәннәрнең барысына да рәхмәт әйтәсем килә, һәм хәзер арабызда булмаганнарны онытмаска өндим, - дип дәвам итте Минтимер Шәрип улы. - Минем карашка, ул елларның иң зур казанышларының берсе - халкыбызның үзаңы үсеше. Без рухилыкка ирешәбез. Сезнең ярдәмегез белән безнең иң һавалы проектларны да тормышка ашырырлык көчебез бар. Бу безнең хәлебездән килү һәм җаваплылык дәрәҗәсе турында сөйли. Без булдырабыз!"

Реклама

Татар-информ

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: