Шәһри Казан

"Каенананың туган көнемә бер шампунь дә алып биргәне булмады"

Айсылу белән очраклы гына таныштык. Ипотека, фатир турында сүз чыккач, яңа танышымның Казанда беркеме дә юк, вакытлыча фатир алып торулары хакында белдем.

Җитмәсә, ире дә акча юнәтер өчен Себергә китеп эшләргә мәҗбүр икән. Айсылу исә ике кечкенә сабый белән айлар буе ялгызы яши. Кечкенәсенә биш ай чамасы гына әле.

- Хәзерге тормышым шөкер, элек белсәң иде син минем ничек яшәгәнемне, - дип сөйләп китте.

Айсылу булачак ире белән очрашып йөргәндә үк каенана буласы кеше аны өнәп бетермәгән. Гел ниндидер кимчелек табып торган.

- Туйны булдырмас өчен дә бик тырышты инде ул, имеш, хастаханәгә керәсе бар, аннары ял итәргә китәргә җыена, шулай да язылыштык, туен да уздырдык, каенана өендә яши башладым. Иремнең акчаны янга калдырасы килде, башка фатирга аерылып чыкмадык.

Беренче көнне үк үземне чит итеп хис иттем мин бу йортта. Ашарга пешерәм, керен юам, артымнан «пычакны урынына куймагансың, нигә итне күп салып пешердең, ник кер машинасын көн дә кабызасың, порошокны күп бетерәсең» кебек сүзләр ишетә килдем. Ирем төзелештә эшли. Беренче кызыбыз тугач, барысына да өлгереп тә җитә алмаганмындыр инде. Иремнең ноские тишелгән булган икән. Мин моны күрмәгәнмен. Әй эләкте инде моның өчен, юньле хатын булсаң, шуны күреп ямап куяр идең, имеш. Баланы калдырып, каядыр бару турында уйлый да алмадым. Нинди әни икән ул, оныгын бик сирәк сөя иде, әйтерсең лә мин аны башка ирдән тапкан, үз малаеның баласы, югыйсә. Беркайчан да аны алып калып, мине ирем белән концерт фәләнгә җибәрмәде. Әнинең ире күптән вафат. Улын терәге, ярдәмчесе итеп күрергә өйрәнгәнгәме, мине улыннан көнләште бугай. Ләкин минем дә нервыларым тимер түгел бит инде.

Балага ике яшь тирәсендә тәвәккәлләп, иремне үгетли-үгетли, аерым фатирга күченеп чыктык. Дөрес, ирем әнисе йортыннан аерыла алмады. Әбәтне әнисендә ашый, сүзгә килгән көнне хәтта анда кунып та кала. Гел бәхәсләшә, талаша башладык. Ышанасыңмы, каенананың туган көнемә бер шампунь дә алып биргәне булмады. Онытып җибәргән, исемнән чыккан, дип котыла иде. Аерым яши башлагач, тынычлап куйдым үзе. Тик монда да килеп җитә башлады ул. Төнлә китап укырга яратам мин. Шуңа да икенче көнне соңрак торам. Берсендә сәгать унда килеп кермәсенме бу.

- Төш вакыты җитә, ә син йоклап ятасыңмы? Оят, әйтәм ирең миңа ашарга килә. Менә нидә икән хикмәт, син ашарга пешерү урынына йокы симертәсең, ялкау, - дип, мине сүгеп китте.

Ирем азрак салган килеш машинасы белән авариягә очрады. Хастаханәгә эләкте. Баланы калдырырга кеше булмагач, беренче көнне сакларга ирем янына бара алмадым. Икенче көнне килсәм, ирем ята торган карават янындагы тумбочкада кәгазь. Каенана язып калдырган: «Иреңә простыня алдым - 250 сум. Табиб бинт сорады - барлыгы 200 сумлык алдым. Фәлән дару шуның кадәр сум. Бер кило апельсин алып кердем (!) - 50 сум... Мин пенсиядә, барлыгы 850 сум, түләрсең». Исем-акылым китте. Үз малае, ләбаса.
Моны ирем дә авыр кичерде булса кирәк. Ул савыгуга, җыенып Казанга күченеп киттек. Монда беркемне дә белмибез. Бары иремнең кайчандыр бергә укыган дуслары гына бар. Башкалага килгәндә кулда кием‑салым белән ноутбуктан башка бернәрсәбез дә юк иде. Вакытлыча торырга фатир табып, шунда яшәп ятабыз. Икенче балабыз туды. Ирем Казанда акчалы эш таба алмады. Себергә китеп эшли башлады. Ярты елдан соң бер айга кайтып килә.

Ирсез тормыш рәхәт түгел, тик каенанасыз тыныч. Бу минем өчен мөһимрәк. Аның белән аралашканым да юк. Ирем ялы вакытында анда бер‑ике атна торып кайта. Йортын карарга булыша. Ни дисәң дә, бердәнбер улы бит. Бәлки мин дөрес тә эшләмимдер, ләкин каенана белән уртак тел табарга күпме генә тырышсам да, булдыра алмадым.

Реклама

Айсылу тарихы бүген дә тынгылык бирми әле миңа, аңа нинди киңәшләр бирер идегез? Үзегезнең каенана белән мөнәсәбәтләрегез ничек? Сездән кайтавазлар, хатлар көтеп калабыз.

Яшь киленнәргә психологтан киңәшләр
- Мөмкин булса, туйдан соң аерым яшәргә тырышыгыз. Әгәр инде бергә торырга туры килә икән, каенананы өстәмә йөк итеп кабул итмәгез.

- Каенана ул сезнең яраткан ирегезнең әнисе. Димәк, ирегезнең шундый акыллы, ягымлы булуында каенананың тырышлыгы зур. Ул аны тәрбияләгән. Ирегезне яраткан кебек, каенананы да хөрмәт итәргә кирәк.

- Каенанадан төрле рецептлар, киңәшләр, ирегезнең балачагы турында сораган булыгыз. Әни дип ешрак әйтегез, хәлен гел белешеп торыгыз.

- Әниегезне бүләкләр белән сөендереп торыгыз, туган көнен исегездән чыгармагыз, әниләр көне, 8 март белән котларга онытмагыз.

- Ирегезне беркайчан да йә әниең, йә мин дигән сайлау алдына куймагыз.

- Үзегезне каенана урынына куеп карагыз, сезнең дә, кайчан да булса, киленегез булу ихтималы бар бит.

- Сүзгә килдегезме, беренче булып сүзне һәрчак килен башласын.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (6)
Осталось символов:
  • 13 ноябрь 2022 - 08:49
    Без имени
    Кемдэ кемнен эше бар , йокласын.Хэрберсе узен мактый.
  • 30 сентябрь 2022 - 11:33
    Без имени
    Авылда булса да, шэхэрдэ булса да кичтэн китап укыдым дип иртэн йоклап ятып булмый(мин кайнана б-н тормыйм), но декретта чакта да, эштэ чакта, отпускта чакта да гел иртэн 5-6 да торам, иргэ, балаларга ашарга эзерлэп, ашатып озатып калам, йоклыйсы булса аннан йоклап була, ансын авторнын кайнанасы дэрес эйткэн. Но башка яктан кысылып йэруе, уз баласына акча жэллэве дэрес тугел инде, кем белгэн кемнен башында нэрсэ икэнен.
  • 30 сентябрь 2022 - 10:17
    Без имени
    Моны укыгач, кайнанасы бн дэ сойлэшэсе килеп китте. Алдан ук таныш булгач, ойлэнештерергэ телэмэгэч, бэлки сэбэбе булгандыр? Берэу дэ фэрештэ тугел, шулай да...
  • 29 сентябрь 2022 - 13:19
    Без имени
    Нишлэп , кайнаналар эллэ туган конгэ булэк тэ бирэлэр ул ? Минеке гомергэ бер яулык та булэк иткэне булмады. Мин аны тиеш дип тэ санамадым.Киресенчэ узебез кубрэк булэк ясарга тырыша идек. Алар безгэ берни тиеш тугел. Улын сина булэк иткэн бит инде. Э йоклауга килгэндэ , мин дэ 10 да йоклап яткан кешене анлый алмыйм. Тоне буе китап укыган чакларда да , как штык сэг 5 тэ сикереп торыш инде ул авылда. Шэхэр жире турында суз бармый. Мин уземнен балалрнын да кондез йоклавын онэмим. Йокыны икенче конне иртэрэк ятып та туйдырырга була. Уземнен эни мэрхум гомергэ дэ безне 7гэ кадэр йоклатмады. Шул гадэт буенча хэзер дэ иртэ торам. Шуна курэ хэр гаилэ аерым яшэуне хуплыйм мин. Яшьлэр узлэренчэ яшэсеннэр , лэкин иргэ хезмэт иту , ир тэрбиялэуне дэ онытып бетермэсеннэр иде. Элек электэн хатын кыз ирне хормэт иткэн , олылаган. Ир кеше дэ , хатынын яратып , ана булышып , эшлисе эшлэрен кинэшлэшеп эшлэсеннэр , яшэсеннэр иде. Бер беренне анлап яшэгэндэ генэ гаилэ ныклы була. Бэхет яшьлэргэ!
  • 29 сентябрь 2022 - 10:28
    Без имени
    Әссәламү гәләйкүм үә рахмәтуллаhи үә бәракәтүһ. Җимешем ә син шулай буласын белмәдеңме? Кайнана әниең сез бергә булуын теләмәгән бит. Ярар син үзеңнең теләгеңә ирешкәнсең, өйләнешкәнсез. Син әниеңә якынлашу өчен, үзең ысуллар табарга тиеш идең. Тәмле тел, ягымлы караш, чисталык пөхтәлек, тәмле ризык. Яшь чакта бик йокы килсә дә 4-5 сәгать йокы җитә. Эшләп кеше үлми. Менә үзең нәтиҗә яса инде.
  • 29 сентябрь 2022 - 10:10
    Без имени
    Минем 33 ел килен булып та, кайнанам туган көнемне белгәне юк!) за то мин аныкын беләм!