Авыл хуҗалыгы цифрлаштырыла

Республика мәгълүмати-исәпләү үзәге генераль директоры Нияз Хәлиуллин билгеләп узганча, авыл хуҗалыгын “цифрга” күчерү проектын гамәлгә ашыру барышында үзәк өч төп юнәлешне алып баралар: “Агрополия” авыл хуҗалыгы сәнәгать комплексы өчен төбәк мәгълүмати системасы булдыру, агропредприятие кадрлары өчен белем күтәрү курслары ачу һәм агробизнесны автоматлаштыру. Нәтиҗәдә бу системалар мәгълүматларның бердәм цифрлы экосистемасын булдырырга ярдәм итәчәк. 

Татарстан авыл хуҗалыгы һәм азык-төлек министрының беренче урынбасары Наил Залаков хәбәр иткәнчә, 21-24 сентябрьдә “Казан Экспо” күргәзмәләр залында Kazan Digital Week халыкара форумы узачак. 

– Безнең министрлык та чарада актив катнаша. Авыл хуҗалыгы блогы иң зур мәйданны – 1000 квадрат метрны алып торачак, – дип белдерде министр урынбасары. 
Форумда түгәрәк өстәлләр кысаларында министрлык һәм ведомство җитәкчеләре, экспертлар һәм дөньякүләм дәрәҗәдәге аналитиклар чыгыш ясар дип көтелә.