16+

«Бакчачы синдромы»ннан ничек сакланырга?

Җәй җиттеме, күпләр бакчасында кайнаша: чүп утый, кишерен, чөгендерен сирәкли, бәрәңге төбен өя.

«Бакчачы синдромы»ннан ничек сакланырга?

Җәй җиттеме, күпләр бакчасында кайнаша: чүп утый, кишерен, чөгендерен сирәкли, бәрәңге төбен өя.

Мондый эшләрдән соң, бигрәк тә эссе чорда булса, күпләр: «йөрәк чәнчи, тын кысыла, күңел болгана», - дип зарлана. «Ашыгыч ярдәм» хезмәтен бакчага чакыртучылар да җитәрлек. Табиблар арасында «бакчачы синдромы» дигән төшенчә дә барлыкка килгән. «Бу буразнаны гына чыгам да аннары ял итәм», - дип эшләгән кешеләр ахыр чиктә хастаханәгә эләгә. Йөрәк чәнчүе инфарктка барып җитмәсен өчен нишләргә?

Республика клиник хастаханәсе кардиологы Альберт Гыйльманов: «Кыш буе өйдә торганнан соң, дачаларга барып, бакча эшләренә тотыну - йөрәк өчен аеруча авыр», - ди. Кызуда организмга болай да җиңел түгел, кояш астында бакчада физик хезмәт башкарсаң, йөрәк авырулыларның гына түгел, сәламәт кешеләрнең дә хәле китәргә мөмкин.

- Миокард инфарктының билгеләре күзәтелсә, күкрәк турысында чәнчү, пешерү тойса, йөрәк авырулы кеше нитроглицерин төймәсе кабарга тиеш. 3 минут көткәннән соң авырту узмаса, тагын бер төймә эчәргә, тагын 3 минут үткәч тә хәл яхшырмаса, «ашыгыч ярдәм» хезмәте чакыртыр­га кирәк. Дөрес, беркайчан да нитроглицерин кулланмаган, әле беренче генә тапкыр йөрәгеннән зарланган кешеләргә бу даруны эчәргә кирәкми. Ул кинәт кенә кан басымын төшерергә мөмкин. Бу даруны 500 миллиграмм аспиринга алыштырсагыз була, -ди Альберт Гыйльманов.

Иң мөһиме - көтәргә ярамый. Миокард инфаркты авыруы бер сәгать эчендә тарала икән. Шул вакыт аралыгында кешенең кан тамырларындагы кан әйләнеше системасы җайга салынмаса, йөрәкнең бер мускулы үлә дигән сүз. Ә миокард үлдеме, йөрәктә җәрәхәт барлыкка килә, ритм эшчәнлеге бозыла, тын алу авырлаша. «Йөрәк өчен иң файдалысы - ял», - ди табиблар.


Бакчада эшләгәндә, нәрсәгә игътибар итәргә?

Йөрәк авырулы кешеләргә кызу кояш астында физик эш эшләргә ярамый.

Башны түбән иеп чүп утау - бик куркыныч. Башка кан саварга, кинәт кан басымы күтәрелергә мөмкин. Нәтиҗәдә инсульт булуы бар.

Бакчада эшләү вакыты түбәндәгечә бүленергә тиеш: 30 минут эшлисең, 15 минут ял итәсең.

Бакчага үзең белән кирәкле даруларны, кан басымын үлчәү аппаратын алып килергә онытмагыз. Ношпа спазм­нарны бетерә, кан басымын да төшерә, глицин баш миенә файдалы, валокордин, корвалол кан тамырларындагы киеренкелекне киметә.

Нәрсә ашарга?

Күбрәк су эчәргә тырышыгыз. Газлы сок, квастан баш тартып, чиста су, морс, яшел чәй эчү яхшырак. Ә менә йөрәк ишемиясе булган кешеләргә, киресенчә, су күп ярамый. Көненә 800 миллилитр сыеклык җитә.

Организмдагы артык су кан басымын күтәрергә дә мөмкин.

Йөрәк эшчәнлегенә кирәкле калий, магнийга бай ризыклар: күрәгә, йөзем, банан, карабодай ашарга кирәк.

Майонез, тозлы, ысланган ризыклардан ерак торыгыз. Сәламәт кешегә көненә 5-6 грамм тоз рөхсәт ителә, ә йөрәк авырулы кешеләргә 1-2 грамм тоз да җитә.

Язмага реакция белдерегез

0

0

0

0

0

Реакция язылган инде

Комментарийлар

Мөһим

loading