Шәһри Казан

ӘПЧ-ХИ!

Май ахырлары җиттеме, танышым гел төчкерә, борыны кычыта, томау төшә, күзләре кызарып чыга, бертуктаусыз яшь агыза башлый. Гел салкын тидереп авыргандагы кебек инде. Ул һәр елны шулай аллергиядән интегә. Үзе кайсы үләннән аллергия икәнен төгәл генә белми дә, эшкә барганда агач-куаклар үскән, яшел чирәм баскан ишегаллары аша үтәм, шуларның кайсыдыр...

Терапевт Вера Соловьева әйтүенчә, соңгы елларда аллергиядән интегүчеләрнең саны да артканнан-арта бара икән.
- Хәзерге вакытта теге яки бу продуктка аллергиясе булмаган кешеләрне табу авыр. Әлбәттә, даруханәләрдә аңа каршы препаратлар сатыла. Әмма аны, тырышканда, булдырмый да калырга мөмкин. Әйтик, нинди дә булса искә аллергия булганда ул ис чыганагыннан ерак булыгыз. Аллергия барлыкка китерә торган ризыкларны ашамаска, тузанлы җирләрдә булмаска, эт-мәчеләр белән «якыннан аралашмаска» кирәклеген инде үзегез дә беләсез.
Хәзер күпләр тузанга булган аллергиядән интегә. Әгәр дә фатирыгызны бик сирәк җыештырасыз икән, генераль уборка үткәрү сезнең өчен бер җәзага да әверелергә мөмкин. Шуңа да аны, тузан җыелып өлгергәнче, ике көнгә бер юып чыгарыгыз. Форточкага дымлы марля элеп куегыз.
Мондый вакытта тузанны үзенә сеңдергән урын-җирләрнең дә пычранганын көтеп тормавың хәерле икән, аларны атнасына бер тапкыр кер юу машинасына тыгып алырга туры киләчәк. Керне исә балконда киптермәгез.
Зирек, каен, өрәңге, корычагач, чикләвек куагы һәм башка агачлар серкәсен без аяк киеменә дә ияртеп кайтабыз. Шуңа да өйгә кайтып керүгә үк аның табанын юеш чүпрәк белән сөртеп куярга кирәк. Агач-куакларның серкәләре вак булган саен, ул шуның кадәр куркынычрак. Әйтик, каен, карама, имән, өрәңге, акация һәм чикләвек куагы серкәләре. Саный башласаң, барлыгы йөзгә якын үсемлек аллергия барлыкка китерергә мөмкин икән.
Серкә очырган вакытта һәр көнне борыныгызны аз гына тоз кушылган җылымса су белән юдыртыгыз.
Вера Соловьеваның сүзләренә караганда, аллергиядән интегүчеләргә туклануга да аерым игътибар бирергә кирәк. Каен серкәсеннән аллергия булганнарга чи кишер, кызыл алма, персик, абрикос һәм киви ашарга ярамый. Чикләвек куагы серкәсеннән зыян күрүчеләргә фундук ашаудан тыелу яхшы булыр. Горчица һәм керән организмнан аллергеннарны чыгарырга сәләтле. Майлы балыклар ашагыз, алар сулыш алуны җиңеләйтә, күздән яшь агуны туктата. Составында фолий кислотасы булган груша, помидор, кәбестә, баллы борыч, салат яфраклары һәм бавыр ашау да хәлегезне җиңеләйтер.

Реклама

Теги: 250
Нравится
Поделиться:
Реклама
Комментарии (0)
Осталось символов: