“Адмирал”да зыян күрүчеләргә хәйрия концерты

Быел Татарстанда яшәүче диаспоралар, "Адмирал" сәүдә үзәгендәге янгыннан зыян күргән эшмәкәрләргә теләктәшлек йөзеннән, ел саен билгеләп үтелә торган "Нәүрүз"бәйрәмен үткәрүдән баш тартты. Күптән түгел махсус шушы сәүдә үзәгендә зыян күрүчеләр өчен хәйрия фонды оештырылган иде. Дуслык йортында күптән түгел милли диаспора вәкилләре белән үткәрелгән очрашуда "Адмирал" янгынында зыян күргәннәргә һәм аларның якыннарына һәртөрле ярдәм күрсәтү турында сүз куешылды. Март ахырында алар ярдәм итү йөзеннән, хәйрия концерты уздырырга ниятлиләр. Концерт 28 нче мартта көндезге сәгать 12 дә Камал театрында узачак.