Игелекле эшләргә дәүләт акчалата ярдәм итә

"Татар-информ" агентлыгында узган матбугат конференциясендә бу хакта Татарстан Республикасы Дәүләт Советы рәисе урынбасары Римма Ратникова хәбәр итте. Конкурс республиканың Икътисад һәм Хезмәт, мәшгульлек һәм социаль яклау министрлыклары тарафыннан оештырыла.

- Халыкка социаль әһәмиятле хезмәт күрсәтергә теләүче җәмәгать активистлары күп, ләкин аларның финанс чыганаклары җитәрлек түгел. Татарстанлыларның тормыш-көнкүрешен яхшыртуга ярдәм итүче идеяләрне гамәлгә ашыру бик кирәкле, - диде Римма Ратникова.

Дәүләттән акчалата ярдәм алу конкурсында коммерциячел булмаган оешмалар гына катнаша. Конкурс ике юнәлешне колачлый. Беренчесе - шәһәр мохитен төзекләндерү, ялларны оештыруның сыйфатын күтәрү, мәдәни мирастан колачлырак файдалануга булышлык, экология тәрбиясе. Икенчесе - яшьләрне ватанпәрварлек рухында тәрбияләү, гражданлык җәмгыятен һәм гаилә институтын ныгытуга булышлык.
Конкурс тәртибе турында республиканың Икътисад министрлыгы, Хезмәт, мәшгульлек һәм социаль яклау министрлыгы, Татарстан Республикасы Иҗтимагый палатасы сайтларында танышырга мөмкин.