Кабан буйлап катерда

Казан шәһәре Башкарма комитетының матбугат хезмәте хәбәр итүенчә, Кабан күле буйлап катерларда экскурсия сезоны ачылган. Ял итү катерлары Иске Татар бистәсендәге "Татар утары"на каршы пристаньнән кузгалып китәчәкләр. Экскурсия көн саен сәгать иртәнге уннан кичке унга кадәр үткәреләчәк. Озынлыгы 45 минут. Су юлы буйлап шулай ук катамаран, көймәләрдә дә йөрергә мөмкин. Катердагы экскурсиянең бәясе бер кешегә 600 сум. Кабан буйлап йөзгәндә шәһәр тарихы белән биш телдә - рус, татар, инглиз, алман, кытай телләрендә таныштырачаклар.