Шәһри Казан

Әбу-Дабидан Казанга кадәр

«WorldSkills» эшче һөнәрләр чемпионаты дөнья буйлап таралган. Аны дөньяның иң бай илләренең берсе – Гарәп Әмирлекләре дә үткәрә. Быел Әбу-Даби шәһәрендә оештырдылар аны.

Без дә әлеге мәртәбәле чемпионатны Париж кадәр Париждан тартып алдык. Киләсе чемпионат 2019 елда Казанда булачак. Татарстанның дөньякүләм чараларны оештыру тәҗрибәсе зур. Шулай да безнекеләр, Әбу-Дабига барып, аларның тәҗрибәсен өйрәнеп кайткан. Хәзер максатыбыз – гарәпләрдән дә уздырып җибәрү.

Спорт һәм социаль проектлар дирекциясе генераль директор урынбасары Эмиль Гобәйдуллин сүзләренчә, Әбу-Дабида узган чемпионатның кайбер җитешсезлекләре дә булган. Әйтик, Гарәп Әмирлекләрендә юл-транспорт хәрәкәтенә артык игътибар бирмәгәннәр. Чемпионатка кешеләр күп килү сәбәпле, аккредитация узу мәйданнарында да «бөке»ләр хасил булган.
– Аеруча ярышлар өчен кирәкле җиһазларны чит илдән кертү проблемалы иде – тоткарлыклар килеп чыкты. Без хәзер Россиягә җиһазларны визасыз кертү системасын төзедек. Куркынычсызлык кагыйдәләренә дә гарәпләр салкын карады. Бездә андый әйбернең булуы мөмкин түгел. «Дубай» аэропортында адашып калучылар да булды. Без исә кунакларны Мәскәү аэропортыннан Казанга кадәр җитәкләп диярлек алып килүне үзебезгә максат итеп куйдык. Дөрес, без Әбу-Дабида җитешсезлекләр генә эзләп йөрмәдек, ләкин күзгә чалынган әйберләрне ничек тә үзебездә булдырмаска иде, – диде Эмиль Гобәйдуллин.

Казандагы чемпионат вакытында мәктәп балалары, студентлар дөньяның иң яхшы белгечләре эше белән танышырга киләчәк. Ярыш барган мәйданнарда кеше күп булу сәбәпле, экскурсиягә килүчеләргә юлкүрсәткечләр белән аерым хәрәкәт маршруты булдырырга ниятли оештыручылар.

Реклама

Безнең чемпионат башкалардан мәдәни программасы белән дә аерылачак. Мәсәлән, «Мәдәни парк» мәйданчыгында Россия халыклары һөнәрләре белән таныштырачаклар. Тагын шунысы бар: чемпионатта мәктәп укучысы да, ата-ана да профессионаллар белән бер мәйданда үзләрен эшче һөнәрләрендә сынап карый ала. Истәлеккә үз кулың белән сувенирлар да ясап булачак.

Бүген «WorldSkills» Россиянең 85 төбәгендә дә киң таралган. «WorldSkills International» башкарма директоры Дэвид Хоуи чемпионатның Россиягә шулкадәр тиз үтеп керә алуына шаккаткан.
– Россиянең кайбер төбәкләрендә, «WorldSkills» без уйлаганнан да яхшырак таралган. Бу волонтерлар әзерләүдә дә сизелә. Сезнең өчен бу чемпионат эшче һөнәрләренең дәрәҗәсен күрсәтү максаты да әле. Монысы тагын да үзенчәлеклерәк, тагын да яхшырак, – диде ул.

Илдәге эшче һөнәрләрен үстерү өчен чемпионат саллы гына мирас та калдыра әле. Төрле илләрдән кайтартылган иң заманча техниканың бер өлеше республикада кала. Аны уку йортлары файдалана алачак. Ә бер өлеше 2019 елда май аенда узачак «WorldSkills Russia» чемпионатында җиңүче төбәкләргә таратылачак.

Алисә Сабирова.

Нравится
Поделиться:
Реклама
Комментарии (0)
Осталось символов: