Путин Астанада ЭКСПО-2017 күргәзмәсендә Татарстан экспозициясен карады

Аны ачу тантанасында Россия Президенты Владимир Путин Татарстан экспозициясен караган. Бу хакта республика башлыгы матбугат хезмәте хәбәр итә. Татарстан Президенты Рөстәм Миңнеханов мәртәбәле кунаклар өчен экспозиция буйлап экскурсия уздырган һәм республиканың Россия һәм Татарстан икътисадын үстерүгә сизелерлек өлеш керткән һәм Казахстан белән хезмәттәшлек иткән алдынгы предприятиеләре турында сөйләгән. Шуны да билгеләп үтәргә кирәк, ЭКСПО-2017да Россия делегациясе составына төбәкләр башлыкларыннан Татарстан Президенты Рөстәм Миңнеханов һәм Чиләбе өлкәсе Губернаторы Борис Дубровский гына кергән.

Владимир Путин Рөстәм Миңнехановка ЭКСПО-2017дә Россия экспозициясен оештыруда актив катнашканы өчен рәхмәт белдергән һәм Татарстанга киләчәктә дә төбәк икътисадына һәм тулаем ил икътисадына инвестицияләр җәлеп итүдә уңышлар теләгән.

ЭКСПО-2017 төп темасы - «Киләчәк энергиясе». Күргәзмәнең төп максаты - җаваплылыкка өндәү, кешеләр табигатькә мөмкин кадәр зыян китермичә, Җир шарында энергияне куллануны планлаштырырга һәм тикшереп торырга өйрәнсеннәр өчен белемнәрне формалаштыру.

Астана шәһәрендә ЭКСПО-2017 халыкара махсуслаштырылган күргәзмәсе 2017 елның 10 июненнән алып 10 сентябренә кадәр барачак.

Россия экспозициясе - ЭКСПО-2017дә иң зур һәм иң күренекле мәйданчыкларның берсе, барысы 1 мең кв. метрны били.

Татарстан экспозициясе 88 кв. метр мәйданда урнашкан.