Сайлаулар буенча беренче мәгълүматлар иртәнге якта билгеле булачак

Сайлаулар тәмам. Кичке сәгать сигездә сайлау участоклары ябылды. Беренче мәгълүматлар иртәнге якта билгеле булыр дип көтелә. Татарстанның үзәк сайлау комиссиясе рәисе Әгъзам Гобәйдуллин сүзләренчә, сәгать алтыга булган мәгълүматлар буенча, республика халкының җитмеш проценты тавыш биргән.

- Мин бу сан 77 процентка җитәр дип уйлыйм. Халык актив булды. Чагыштыру өчен әйтәм: Башкортстанда - 53,3, Мари Элда - 46,6, Удмуртиядә - 38,4, Самарада - 44,14, Ульяновскида 44,6 процент халык тавыш биргән, - диде Әгъзам Гобәйдуллин.