#Кыскача яңалыклар 26 ноябрь 2025, 15:10

М7 трассасында “Лада Гранта” белән йөк машинасы бәрелешкән: ике кеше хастаханәгә озатылган

26 ноябрь 2025, 15:10

Бүген, 10:40 сәгатьтә, М7 трассасының Югары Ослан ягына таба 787нче чакрымында юл һәлакәте теркәлгән.

Скопировать ссылку

Бүген, 10:40 сәгатьтә, М7 трассасының Югары Ослан ягына таба 787нче чакрымында юл һәлакәте теркәлгән.

Алынган мәгълүматларга караганда, 11 ай элек кенә машина йөртү таныклыгын алган ир-егет идарәсендәге «Лада Гранта» автомобиле «Мерседес» йөк машинасы белән бәрелешкән.

Фаҗига нәтиҗәсендә җиңел автомобиль йөртүчесе һәм аның пассажиры җитди зыян күргән. Аларны ашыгыч медицина ярдәме бригадасы тарафыннан медицина учреждениесенә озатканнар.

Йөк автомобиле йөртүчесе сүзләренә караганда, «Лада Гранта» сул полосадан барган, әмма кинәт уңга күчәргә маташкан. Машинаның уң ягы юл кырыена чыгып калган, шуннан соң ул кискен хәрәкәт белән йөк машинасының уң почмагына һәм бортына килеп бәрелгән.

Һәлакәт сәбәпләре тикшерелә. ЮХИДИ хезмәткәрләре юлда хәрәкәт иткән вакытта саклык чараларын катгый үтәргә чакыра.

Кызыклы яңалыкларны күзәтеп бару өчен Т елеграмга кушылыгыз.