Шәһри Казан

Гүзәл Болгарга җыена

«Яңарыш» тарихи һәм мәдәни һәйкәлләрне торгызу республика фондының 5 еллыгы уңаеннан, Татарстанның Мәгариф һәм фән министрлыгы борынгы Болгар шәһәре һәм Зөя утрау-шәһәрчеге турында рәсем һәм инша бәйгеләре уздырды. Туган җиргә мәхәббәт, тарихи тамырларыбызны барлауны күздә тоткан әлеге бәйгедә 7 яшьтән 18 яшькәчә булган балалар, үсмерләр 186 инша, 349 рәсем белән...

«Яңарыш» тарихи һәм мәдәни һәйкәлләрне торгызу республика фондының 5 еллыгы уңаеннан, Татарстанның Мәгариф һәм фән министрлыгы борынгы Болгар шәһәре һәм Зөя утрау-шәһәрчеге турында рәсем һәм инша бәйгеләре уздырды.
Туган җиргә мәхәббәт, тарихи тамырларыбызны барлауны күздә тоткан әлеге бәйгедә 7 яшьтән 18 яшькәчә булган балалар, үсмерләр 186 инша, 349 рәсем белән катнашты. Беренче бәйгенең җиңүчеләрен Казан Кирмәнендә Татарстан Рес­публикасы Дәүләт Киңәшчесе, «Яңарыш» фондының попечительләр советы рәисе Минтимер Шәймиев тәб­рикләде.
Бүгенге кунагыбыз - әлеге бәйгедә 15-18 яшьлекләр арасында I дәрәҗә дип­лом белән бүләкләнгән Азнакай шәһәренең 7 нче урта мәктәбе укучысы Гүзәл ВӘЛИЕВА.
- Гүзәл, мондый җи­ңүләр очраклы гына булмый. Рәсем сәнгате белән күптәннән кызыксынасыңмы?
- Балалар бакчасына йөргәндә үк сәнгать мәктәбенә илтүләрен сорый идем. 8 яшемнән 14 яшькә кадәр Балалар сәнгать мәктәбендә укыдым. Портрет, пейзажлар, хайваннар ясарга яратам. Конкурс турында класс житәкчем аша белдем. Моңа кадәр дә конкурс­ларда жиңгәнем булды, ләкин алар болай ук масштаблы бәйгеләр түгел иде.
- Син эшеңне ниндидер хатирәләргә нигезләнеп эшләдеңме? Бәйге, гомумән, нинди тәэсирләр калдырды?
- Минем әлегә Болгарда булганым юк. Июль аенда барырга гына җыенам. Болгарның табигатен, архитектура корылмаларын интернет һәм китаплар аша гына күреп беләм, ә менә Зөя утрау-шәһәрчегенә сыйныфташларым һәм класс җитәкчебез Гөлфинә Нашатовна белән барганыбыз бар.
Бүләкләү тантанасы бик истә калды: Минтимер Шәймиев тә рәсемемне ошатты. Бик күп сәләтле балалар белән таныштым.
- Сыйныфыгызның үз рәссамы булгач, сабакташларыңа рәхәттер.
- Әйе, мәктәптә кирәк чагында плакатлар ясыйм. Үткән жәйдә дусларым Миләүшә һәм Азалия белән актлар залына мультфильм геройлары ясадык. Эш җитәрлек, дусларым белән кыска фильм­нар да төшерәбез, үзем мультфильмнар да ясыйм, олимпиадаларда катнашам. Быел 10 нчы сыйныфны тәмамладым.
- Киләчәктә кайда укырга җыенасың?
- Сәнгать белән бәйле факультетка укырга керер­гә уйлыйм. Гәрчә үзләре сәнгатьтән ерак кешеләр булсалар да (әтием оператор, әнием бухгалтер), әти-әнием минем ниятемне хуплыйлар.
- Мультфильмнарың, кыска роликларың турында да әйтеп кит инде.
- Башта классташларыбыз белән җәмгыять белеме дәресенә өй эше итеп һәм төрле бәйрәмнәргә, мәсәлән, Әниләр көненә социаль роликлар ясый идек. Аннары бәйгеләрдә дә катнаша башладык. Ә мульфильмнарга килсәк, мин аларны баштанаяк үзем пластилиннан ясыйм, аннан соң үзем төшерәм. «Мультикультурализм: зур җиңүгә кечкенә адымнар белән» дигән бәйгедә өлкәннәр арасында беренче призны яуладым. Татарстан Республикасы Милли музее һәм «Татармультфильм» берләшмәсе ярдәме белән, «Сами» ирекле клубы уздырган иде анысын.
Реклама

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: