Фидан Гафаров: «Чирләргә вакытым юк, 5 яшьлек кызым белән мәш киләм»

- Фидан абый, ни өчен бүгенге көндә театр дөньясында «Фидан һәм Нурия»ләр юк? Сезнең шулкадәр популяр пар булуыгызның сере нидә?
- Андый парлар гасырга бер генә туарга мөмкин. Һәрвакыт пәйда булып торсалар, халыкка да кызык булмас иде. Сере - бер-беребезгә пар килүдә, бер чор кешеләре булуда. Мәхәббәтне без бертөрле уйный идек, хәзерге яшь актерлар - башка төрле. Ә бит тамашачының элекке, саф, югары мәхәббәт хисләрен күрәсе килә, ә аны сәхнәләштермиләр... Шул да аның бер середер.

- Сезнең карашка, бүген сәнгать алдында торган иң зур проблемаларның берсе?
- Билгеле, хәзер сәнгать бизнеска корылган. Актер булсам да, мин дә җырлап йөрим, чөнки акча кирәк. Ә концерт кую җиңел түгел: аренда, реклама, оештыру моменты, репетицияләр... Тамашаның датасы билгеле булгач, Мәдәният сараена барып көн билгелисең. Шунда ачыклана: зал алырга концерт сезонында бер генә буш көн дә калмаган икән. Бүген бит бар да җырлый, бар да концерт куя, ә безнең кебек профессионалларга сәхнә дә калмый. Шунысы үкенечле.

Җырлаган була инде яшьләр... Әмма аларның иҗаты берничек тә йөрәкне яулап алырлык түгел. Алар тәүдә җыр хакында түгел, ә костюм, прическа турында уйлый. Иң мөһиме - матур күренү дип уйлыйлар. Бүген Совет заманында булган күзәтчелек юк. Элек бит гастрольгә чыгам дисәң, башта Мәдәният министрлыгыннан күзәтчелек вәкилләре килеп, программаң белән таныша иде. Тамашачыга моны чыгарырга буламы, юкмы - алар хәл итә. Бәлки син үзеңнең концертың белән начар юлны пропагандалыйсыңдыр?! Әлеге «надзор»ны кире кайтарырга кирәк!

- Кызыгыз хакында сөйләп үтсәгез иде. Сер түгел, өлкән яшьтә әти булуыгыз тамашачыларны гаҗәпкә салды.
- Кызым Самирага биш яшь. Әнисе авырга узгач, бу хәбәрне хатыным Фәридәгә дә, улым Азаматка да ишеттердем. Алар каршы тормадылар. Аллага шөкер, мөнәсәбәтләре бик яхшы. Кызым белән көн саен күрешеп торабыз. Ул бик актив һәм талантлы бала. Фигуралы шууга йөртәм, Айдар Галимов студиясенә җыр-биюгә яздырдым. Хәзер чирләргә дә вакыт юк, Самира белән мәш киләм! Өлкән яшьтәге ата-анадан аеруча акыллы балалар туа диләр бит. Самира - бик гаҗәеп бала, хәтере уникаль, берничә телдә сөйләшә. Кызым туу - минем өчен зур бәхет. Күптән түгел аңа багышлап шигырь яздым, аны көйгә салырга композитор Урал Рәшитовка бирдем. Тиздән сәхнәдә Самирама багышланган җырны башкарырмын.

- 30-40 ел элек тә сәхнәдән хатын-кызларга мәдхия укыгансыз, бүген дә аларга багышлап шигырьләр сөйлисез.
- Чөнки гомер буе хатын-кызларга табынып яшәдем. Ходай мине гүзәл затлар өчен генә яраткандыр. «Синең башыңны хатын-кыз ашап бетерер инде», - дип, мәрхүмә әнием еш әйтә иде. Яратам мин хатын-кызларны!

- Мөгаен, интервьюны укып чыкканнан соң, хатын-кыз укучыларыбызның күңеле чәчәк атар. Мондый югары нотада тәмамлау бик отышлы. Җанлы әңгәмә өчен Сезгә зур рәхмәт! Иҗади уңышлар һәрчак юлдаш булсын!
- Үзегезгә рәхмәт. Татарстан тамашачысына әйтәсе килгәнем шул: февральдә гастрольләр белән сезнең якларга җыенам. Күрешкәнгә кадәр!

Безнең белешмә
Тулы исеме: Фидан Сафа улы Гафаров
Туган көне: 1947 елның 12 октябре
Туган җире: Башкортстан, Дүртөйле районының Яңа Уртай авылы
Гаилә хәле: өйләнгән, тормыш иптәше - Фәридә; балалары - Айбулат (мәрхүм), Азамат, Самира; оныклары - Нәргизә, Нурлана