“Парламент дәресләре”, яки ничек депутат булырга?
Безнең укучылар хәзер үзләренең хокукларын бик яхшы белә. Ә менә хокуклардан тыш, бурычларыбыз барлыгын да онытып бетермәскә кирәк. Мәктәп укучысына җәмгыять, граждан, ватанпәрвәрлек төшенчәләрен ничек аңлатырга? Татарстан Дәүләт Советында республиканың мәгариф идарәләре җитәкчеләре, тарих һәм җәмгыять белеме укытучылары өчен быел чираттагы “Парламент дәресе” үткәрелде.
“Парламент дәресләре" инде 15нче тапкыр уздырыла. Быел ул 1-18 февраль көннәрендә мәктәпләрдә үткәреләчәк. Ел саен төрле-төрле темалар өйрәнү, сорауларга җавап эзләү, җирле депутатлар белән очрашу, төрле квест-дәрес форматында да уза ул. Һәрхәлдә, ул дәресләрдә күтәрелгән темалар беркемне дә битараф калдырмый. Быел “Без – Россия гражданнары” темасы үзәккә алына. Татарстан Дәүләт Советы рәисе Фәрит Мөхәммәтшин үткәргән дәрестә бик күп темалар күтәрелде. Гаиләдәге һәм мәктәптәге тәрбия эшләренең әһәмияте дә билгеләнде. Укытучының ролен күтәрү турында да сөйләп үтте ул. Сәяси вакыйгалардан да читтә кала алмадык. Туган ил, Ватан, патриотизм темаларына да тукталдык.
– Дәүләт Советында гадәттәгечә “Парламент дәресләре"ндә күтәреләчәк темаларны барладык. Быел балаларны тәрбияләү, патриотизм темалары үзәккә алыначак. Яшьләребезне ничек саклап калырга? Алар белән бу дәрестә патриотизм, үзенең яшәгән илеңне ничек яратырга кирәклеген аңлатып узарга кирәк. Бу хакта бүген дә бик яхшы чыгышлар булды. Татарстан парламенты республиканың мәдәният һәм мәгариф министрлыгы белән бергә уртага салып сөйләшкәннән соң, шушы темага тукталырга килештек. Мәктәпләрдә яшьләребез белән эшләүне укытучылар белән бергәлектә алып бару кирәк. Балалар бакчасыннан башлап тәрбия бирү эше алып бару бик мөһим, – дип сөйли Фәрит Мөхәммәтшин.
Фәрит Мөхәммәтшин шулай ук халыклар арасындагы мөнәсәбәтләргә, шулай ук җанисәп алу мәсьәләләренә дә тукталды. “Гаеп артта да, тәртәдә дә бар. Без күбебез бу хәлләргә битараф кала алмыйбыз. Россиядә 16 млн кеше җанисәптә бөтенләй катнашмаган”, – дип сөйли ул җанисәптәге саннарга тукталып.
Укучыларга кызык булачак
Мәктәпләрдә әлеге дәресләрне үткәрүнең төрле формаларын кулланалар. Мәгариф белгечләре әйтүенчә, укучылар “Парламент дәресләре" белән кызыксыналар.
- Дәресләрне оештыру мәгариф идарәсе җитәкчесенең идеяләреннән дә тора. Очрашулар депутатлар катнашында да үтә. Балаларга бик кызыклы, алар яшьтән үк лидерлык сыйфатлары белән тәрбияләнәләр. Аларның депутатларга сораулары күп. “Ничек депутат булырга”, “Депутат булыр өчен нәрсә эшләргә кирәк?” дип тә сорыйлар. Гомумән, очрашулар бик кызыклы һәм кайнар уза дип тә әйтер идем. Парламент дәресләре балаларга җавапчыллык тәрбияләргә этәргеч тә бирә. Укытучыларга җаваплылык турында күбрәк аңлатырга кирәк. Ватанпәрвәрлек темасын гел алабыз. Быел аңа күбрәк игътибар бирәчәкбез”, - дип сөйли Мөслим районы мәгариф идарәсе җитәкчесе Лилия Хәбибуллина.
Дәүсоветта узган “Парламент дәресе”ндә утыручыларның күбесе тарих һәм җәмгыять белеме укытучылары. Әлмәтнең “Адымнар” мәктәбенең тарих һәм җәмгыять белеме дәресләре укытучысы Гөлнара Гатауллина да әлеге дәресләрнең файдасы зур булуын әйтә.
- Парламент дәресләре бик кирәк. Мәктәп программаларыннан тыш балаларга өстәмә белем бирергә дә кирәк. Без егерме беренче гасырда яшибез. Балалар 20-21 гасырны программа буенча 10 сыйныфта гына өйрәнә. Ә менә кечкенә классларда милләтара мөнәсәбәтләр турында өстәмә дәресләр кирәк. Шуңа бу парламент дәресләренең файдасы зур. Балалар кызыксыналар. Әгәр дә дәресне кызыклы итеп, бүгенге көн белән бәйләп, бүгенге аларның проблемаларын да күрсәтеп квест уеннары формасында кызыксындырырга кирәк. Балалар начар түгел, балалар бик яхшы. Алар беркатлы. Алар укытучының авызына карап торалар. Укытучы бик зур роль уйный. Берара укытучы кырыйда дирижер гына булып торырга тиеш дип әйтә башладылар. Миңа калса ул дөрес түгел, беренче урында – укытучы! Әгәр дә укытучы дәресен дөрес итеп җиткерә икән, бала белемле булачак. Аннан дәресләрдә һәрвакыт балаларның хокуклары һәм бурычлары дигән бик зур тема да гел кызыксыну уята, – дип сөйли Әлмәтнең “Адымнар” мәктәбенең тарих һәм җәмгыять белеме дәресләре укытучысы Гөлнара Гатауллина.
“Парламент дәресләре” кысаларында 1 февральдән 31 мартка кадәр укучылар арасында рәсем, инша, эссе, видеороликлар, мәктәп проектлары буенча бәйге узачак. Укытучы-педагоглар арасында методик эшләнмәләр дә бәяләнәчәк. Быел беренче тапкыр мәктәп музейлары өчен дә бәйге булачак. Укучылар мәктәп музее турында кыска видеофильм яисә видеоролик төшерү, аның уникальлеген раслау, анда патриотик тәрбия эшләре, кече Ватанга мәһабәт, Ватанга тугрылык темалары аваз табарга тиеш. Бәйгеләргә апрель аенда Россия парламенты көнендә нәтиҗә ясалачак.
Иң мөһим һәм кызыклы язмаларны Татмедиа Telegram-каналында укыгыз
