Шәһри Казан

Быел яман шеш авыруларыннан үлүчеләр саны 1 процентка кимегән

2016 ел медицина өлкәсендә онкологик авырулар белән көрәш елы дип игълан ителгән иде. Республика клиник онкология диспансерында узган матбугат конференциясендә Сәламәтлек саклау министры Адел Вафин гадәттәгечә узып баручы елга йомгак ясады, киләчәккә планнар белән уртаклашты. 2017 ел терәк-хәрәкәтләнү аппараты авыруларына каршы көрәшкә багышланачак, дип хәбәр итте министр журналистларга.

Әлеге теманың сайлануы очраклы гына түгел, бу мәсьәлә бик актуаль булып тора.

- Сөяк сыну, имгәнүләр еш очрый. Өлкән кешеләр белән бу хакта аеруча да кисәтү эшләре алып барырга кирәк. Ялгышмасам, бот муентыгы сынып операция ясалган иң өлкән кешегә 99 яшь иде. Сыну очракларында операциядән башка дәвалау ысуллары юк. Шуңа да кисәтү, профилактика эшләре алып бару бик мөһим. Республикабызда уртача гомер озынлыгы арта бара, шуңа да без бу мәсьәләгә җитди карарга һәм әзер булырга тиешбез, - диде Адел Вафин.

2006 елда республикада кешенең уртача гомер озынлыгы 69 яшь булып саналса, медицинадагы югары технологияләр, яшәү сыйфаты яхшыру белән бәйле рәвештә, бүген бу күрсәткеч 72,8 яшь булып санала. Республикада соңгы 11 айда үлүчеләр саны кимегән, туучылар саны буенча Татарстан Идел буе федераль округында лидер төбәк булып тора.

- Былтыр еллык йомгакка багышланган матбугат конференциясендә журналистларга онкологик авырулардан үлүчеләр саны 8 процентка арткан дип әйткән идем, бүген исә яман шеш авыруларыннан үлем очракларын 1 процентка киметә алдык дип әйтә алам. Бу аз кебек, әмма быел, узган ел белән чагыштырганда, рактан бакыйлыкка күчкәннәр саны 44 кә азрак. Моңа әлбәттә, Президент Рөстәм Миңнеханов тарафыннан 2016 елның онкологик авыруларга каршы көрәш елы дип игълан ителүе дә, бу кысаларда үткәрелгән кисәтү эшләре дә, журналистларның халыкка дөрес мәгълүмат тапшырулары да йогынты ясады, - диде министр.

Реклама

Онкологик авырулар белән көрәш өчен бездә җитәрлек шартлар тудырылган. «Бары авыруны дәваларга мөмкин булган беренче һәм икенче стадиядә ачыклау мөһим, моның өчен үзебезгә карата игътибарлы булырга, даими тикшеренеп торырга кирәк», - дип саный Адел Вафин.

Министр әйтүенчә, еш кына кеше авырый, әмма ахыр чиккә кадәр табибка мөрәҗәгать итми, дәваланганнан соң да хастаханадә тикшеренеп тормаучылар бар. Әмма, ахырдан соң булуы бар. Шуңа да нәрсә борчый, барысын да табибка яшерми сөйләргә кирәк, үз белдеклегең белән дәвалану яман нәтиҗәләргә китерергә мөмкин.

Бүген республикада 20 юнәлеш буенча югары технологияле медицина ярдәме күрсәтә торган 15 учреждение санала. Казаннан тыш Чаллы, Әлмәт шәһәрендә йөрәк- кан тамырлары авыруларына уңышлы операцияләр ясала. Әле яңа ел алдыннан гына Әлмәттә «Татнефть» медицина санитар бүлегендә ачылган гибрид операция бүлеге кардиохирургия буенча тагын да күбрәк операцияләр ясарга мөмкинлек бирәчәк. Диспансеризация кысаларында онкологик авыруларны беренчел стадиядә ачыклау өчен бушлай анализлар алына. Медицина учреждениеләрен төзекләндерү, яңа объектларны кулланышка тапшыру өлкәсенә килгәндә, соңгы өч елда төзелеш өчен 10 миллиард сумнан артык акча тотылган. Быел сафка баскан Иннополис шәһәрендәге медицина үзәгендә терәк-хәрәкәтләнү аппараты авырулары белән бәйле 30 меңгә якын операция ясала. Авырулар операциядән соң сыйфатлы тернәкләнү курслары уза алсын өчен хастаханәнең ике каты шуның өчен каралган. Көн саен авыруларны махсус автобуста алып килеп, дәвалау сеанслары уздыралар. Ярты ел эчендә 350 гә якын кеше тернәкләнү узган. Республика клиник хастаханәсе каршында ачылган перинаталь үзәк тә - зур вакыйга. Йөклелекне саклап калу, сәламәт бала тудыруга юнәлдерелгән әлеге киң профильле үзәк 100 хатын-кызга исәпләнгән. Фельдшер акушерлык пунктлары салдыру да авыл җирендә медицина ярдәме күрсәтү дәрәҗәсен арттыра, халыкка беренчел ярдәм күрсәтүдә уңайлыклар тудыра.

Киләсе елга килгәндә, Татарстан сәламәтлек саклау министрлыгы цифрлы мәгълүмати технологияләр кулланып эшләргә җыена. Яңа туган сабыйларга, хатын-кызларга йөклелек чорында мөмкин кадәр күбрәк ярдәм күрсәтү, Россиянең ерак төбәкләрендә яшәүчеләргә тиз арада медицина ярдәме күрсәтүне тәэмин итү, фармацевтикада ялган дарулар булдырмауны контрольдә тоту, белгечләрне заманча һөнәри стандартлар буенча әзерләүгә дә зур игътибар биреләчәк. Онкологиягә кагылышлы, йөрәк-кан тамырлары авыруларын кисәтү буенча киләсе елда да эш алып барырга кирәк, диде министр. Бу темалар һәрчак актуаль.

2016 елның 11 аенда Татарстанда кан әйләнеше системасы авыруларыннан 634, миокард инфарктыннан 152, сулыш органнары авыруларыннан 301, ашкайнату органнары авыруларыннан 447, туберкулездан 36 кешегә кимрәк үлгән.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: