Шәһри Казан

Коронавирус белән авырсаң, җылы якка бармый тор

Чәч коела, хәлсезлек, хәтер юк, әйтергә теләгән сүз тел очында тора, искә төшми... Коронавирус белән авырып алган кешеләрнең күбесенә хас бу билгеләр.

Авырудан соң тернәкләнү турында медицина фәннәре докторы, Сәламәтлек саклау министрлыгының медицина тернәкләнүе буенча штаттан тыш белгече  Резеда Бодрова туры эфирда сөйләде.

Кешенең ни дәрәҗәдә авырганына карап, тернәкләнү ысуллары да аерыла. Кемдер ковидны җиңелчә кичерергә мөмкин, икенче берәүләрнең үпкәсе ялкынсына, мөстәкыйль сулыш ала алмый. Шуңа да төрле кешедә төрле билгеләр күзәтелә. Авыруны авыр кичергән кешеләрне гадәттә, тернәкләнү узар өчен « Нехама» шифаханәсенә юллыйлар. Уртача формада авырып алучылар терелеп 14 көн узгач, теркәлү урыны буенча сырхауханәгә мөрәҗәгать итә ала. Аларны амбулатор тернәкләнү курсларына җибәрәләр. «Авыруны уртача кичергән кешеләрдә йокы режимы бозылу, хәлсезлек, тиз ару, хәтер югалу күзәтелә. Бигрәк дә артистлар текстларны ятлый алмаудан зарлана. Иң куркынычы –  алар бу халәт өчен борчыла, хәтер кире кайтмас дип курка. Шуңа да курсларда алар белән психологлар да эшли», –  ди Резеда Бодрова.  

Реклама

Җиңелчә авырган кешеләр өйдә тернәкләнә ала. Моның өчен җитәрлек йокларга, витаминнар эчәргә, эш белән ялны аралаштырырга, дөрес тукланырга кирәк. Яшелчә, җиләк-җимешләр файдалы. Яшел тәмләткечләр дә киңәш ителә. Хәзер укроп, суганнарны кайберәүләр тәрәз төпләрендә дә үстерә.  Физик күнегүләр, эш башкарганда чама хисен онытырга ярамый. Әгәр авырганчы спорт белән шөгыльләнгән булсагыз, әйтик, көненә 3-7 километр йөгергәнсез икән, терелүгә күнекмәләрне элеккечә дәвам итү тыела, барысын да акрынлап башкарырга кирәк.

Башта 10-15 минут җиңелрәк күнегү эшләү дә җитә. “ Бүген йокларга ятып, иртәгә тулысынча тернәкләндең дигән сүз түгел, моның өчен вакыт кирәк, шуңа да ашыкмасаң яхшырак.  Коронавирус кичергән кешеләргә тулысынча тернәкләнмичә җылы якларга да барырга киңәш ителми. Чөнки инсульт,инфаркт булу куркычы зур. Тромблар өзелүе, эсседә кешенең хәле начарлануы бар”,–  ди табиб.

 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: