Шәһри Казан

Разил Вәлиев: “Бөтен нәрсәм дә бар, миңа сәламәтлек теләгез!"

Санап бетергесез мактаулы исемнәр иясе, милләт сакчысы, дәүләт эшлеклесе, халык шагыйре, сөекле ир, газиз әти, абый, дус, киңәшче, татарның бөек улы Разил Вәлиевнең 75 яшьлек гомер бәйрәме уңаеннан, Г. Камал театрында бәйрәм узды. Якын дусты, шагыйрь Рәдиф Гаташ аны оҗмах тудыручы, дип зурлады.

Гомумән, Разил абый адресына бәйрәм кичәсендә бик күп мактау һәм рәхмәт сүзләре әйтелде. Аны хөрмәт итеп килгән тамашачылар белән зал шыгрым тулы иде. Сәхнәдән яңгыраган һәр чыгыш, шигырь булсынмы, җырмы, әдипнең язганнарыннан өзекләрме, көчле алкышларга күмелде.

Бәйрәм кичәсендә еладык та, көлдек тә, уйларыбыз белән әби-бабайлар, әти-әниләр янына, туган якка да кайтып килдек. Чараның эчтәлеге дә бик бай иде. Разил абыйның юморга осталыгы чагылыш тапкан шигырьләр белән бергә, күңелнең нечкә кылларын тибрәндерерлек, хәзерге көндәге халәтебезгә туры килгән гаҗәеп иҗат әсәрләре укылды. 

Чараның хөрмәтле кунагы, Разил Вәлиев белән күп еллар дәвамында бергә Дәүләт Советында эшләгән Татарстан Дәүләт Советы рәисе Фәрит Мөхәммәтшин да язучылар, сәясәтчеләр арасында теле, үткерлеге, тапкырлыгы белән республика тормышында тирән эз калдырган шәхес булуын кабат-кабат әйтте. “Авыр заманнарда бергәләп эшләдек. Халык арасына чыгып, җитди сорауларга җавап биреп, бик катлаулы мәсьәләләрне хәл итте. Миңа татар телен өйрәткән кеше дә Разил Вәлиев булды. Аның шигырьләрен көзге каршына басып кычкырып укый идем. Аңламаган сүзләрнең мәгънәсен, тәрҗемәсен сорый идем”, – дип рәхмәт сүзләрен җиткерде. 

Реклама

Язучылар берлеге рәисе Ркаил Зәйдулла да Разил абый белән хатирәләрен яңартты. Аның яшь чакта ук язылган шигырьләренә тугры булып яшәвен әйтте. 
Якташлары исеменнән, Түбән Кама районы башлыгы һәм мэры Рамил Муллин котлады. Разил абыйның туган авылы Ташлыкны үстерүгә керткән өлешен дә югары бәяләде. Авылдашы, сыйныфташы, партадашы, якын дусты Алмаз Хәмзин белән бергә Разил абый үзе дә, баянга кушылып, бик матур җыр башкарды.

"Кайчандыр, 13 яшьлек ике малай туган авылыбыз Ташлык мәдәният йорты сәхнәсендә җырлаган идек. Ул вакытта Казан үзәгендә урнашкан Камал театры сәхнәсендә чыгыш ясарбыз, дигән уйлар хәтта башка да кермәгән иде”, – дип искә алдылар балачакларын. Кечкенәдән үк якты хыяллар, матур планнар белән яшәгән гади генә авыл баласын бүген татар халкы зурлады.

Милләтенә, укучыларына, тамашачыларына булган хөрмәтен, яратуын, рәхмәт сүзләрен Разил Вәлиев шигырьләре аша җиткерде. “Минем инде бөтен нәрсәм дә бар. Миңа сәламәтлек теләгез. Әле иҗат итәсе әсәрләрем бик күп”, – диде юбиляр. Сәламәт булыгыз, Разил абый. Озак еллар сезнең яңа шигырьләрегезне, язмаларыгызны укып яшәргә язсын безгә дә. 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: