«Мылтык тотып басып тормагач, без дә нәрсә беләндер булышырга тиеш бит инде...»

Популяр җырчы Рафис Кәлимуллин “Россия волонтерына” медале белән бүләкләнгән. Җырчы махсус хәрби операция башланганнан бирле яу кырындагы егетләргә гуманитар ярдәм җибәрә. Ул үзе дә хәрби операция зонасына гуманитар йөк белән барган җырчы. 
“Бу безнең уртак бүләгебез, һәркөн егетләребезгә ярдәм итүчеләрнең хезмәтен бәяләү. “Барысы да җиңү өчен Нурлат” хәйрия фондына аерым рәхмәтләремне белдерәм. Бу зур эшкә үз өлешемне кертә алуым белән горурланам”, - дип хәбәр иткән җырчы социаль челтәрдәге шәхси сәхифәсендә .
- Рафис, сезнең дә гаиләгез бар, бурычларыгыз да җитәрлектер. Ни өчен махсус хәрби операциягә га ярдәм итү сезнең өчен мөһим?
- Бурычларым да, кредитларым да бар. Үзем мылтык тотып сугышка бара алмагач, егетләргә матди яктан булса да ярдәм итәсе килә. Бәлки, минем эшләрем башка кешеләргә дә үрнәк булыр, алар да волонтерлыкка кушылыр. Мылтык тотып басып тормагач, без дә нәрсә беләндер булышырга тиеш бит инде. Яу кырында аягын, кулын имгәтеп кайткан егетләр: “Син ничек булыштың?” - дип сораса, ничек җавап бирергә? Бөтен Россиядә хатыннар ирләрен, аналар улларын югалтканда мин нәрсә эшләдем? Бу сорауны һәркем үзенә бирергә тиештер, - диде безгә Рафис.