16+

Чемпионнар

21-24 июль көнне Казахстанның Астана шәһәрендә «Экспо-2017» халыкара күргәзмәсе кысаларында билбау көрәше буенча унбишенче дөнья чемпионаты узды. Татарстан егет-кызлары бу ярышта биш алтын һәм бер көмеш медаль яулап кайтты.

Чемпионнар

21-24 июль көнне Казахстанның Астана шәһәрендә «Экспо-2017» халыкара күргәзмәсе кысаларында билбау көрәше буенча унбишенче дөнья чемпионаты узды. Татарстан егет-кызлары бу ярышта биш алтын һәм бер көмеш медаль яулап кайтты.

Җиңүчеләр барыбызга да яхшы таныш. Раил Нургалиев, Фәрхәт Фәйзуллин, Илнар Закиров, Гәбдеҗәлил Сөләйманов исемнәре көрәш белән кызыксынган һәркемнең колагында яңгырап тора. Араларында ике гүзәл зат та бар: Чаллы кызы Зәмирә Әхмәдова - беренчелектә, ә Зәй батыры Екатерина Бусова көмеш медаль белән кайтты. Республика көрәшчеләре дөньяның 45 иленнән килгән 200гә якын спортчылар белән бил алышты. Ярышлар ирекле һәм классик стильдә барды.

«Титулны саклап калу авыррак»
Зәмирә Әхмәдова спорт белән тугыз яшеннән шөгыльләнә башлый. Көрәшкә бераз соңрак - 15 яшендә килә. «Ни өчен көрәшне сайладың?» - дигәч, «Минем башка чарам юк иде, әтием - көрәшче», - дип елмая чая кыз. Зәмирә инде икенче тапкыр дөнья чемпионы титулын ала. Россия чемпионаты, ил кубогында да яулаган алтыннары җитәрлек аның. Авырлыгы 52 килограмм гына булса да, көндәшләрен атып кына бәрә.

- Бу ярышларга мин үземне кызганмыйча әзерләндем. Беренче тапкыр җиңү ул бер хәл, титулны саклап калу - авыррак. Көндәшләрең, алдагы елдагы чыгышыңа карап, сиңа тиңләшеп әзерләнә бит. Ярышлар алдыннан авырлык куу да үзе бер сынау, - ди Зәмирә.

Җиңелгән булса да, төшенкелеккә бирелә торганнардан түгел Чаллы кызы. 2015 елда беренче тапкыр чемпион булып, аннан соңгы елда бронзага гына ия була. Быел чемпион исемен кабат аклый.

- Җиңүләр дә, җиңелүләр дә мине тагын да тырышыбрак эшләргә илһамландыра, - ди Зәмирә.

Бер карашка, көрәш - көчле затлар спорты гына кебек. Кыз кешене келәмдә күрергә ияләшмәгән шул без. Шулай дигәч, Зәмирә:

- Мин ике тормышны бергә алып барырга өйрәндем. Спортзалда - бил бирмәс көрәшче, ә аннан читтә - гади, «көчсез» кыз. Киресенчә булса, ике өлкә дә аксый башлый. Әти-әни һәрвакыт минем яклы булды. Беркайчан да, кыз кешегә бу килешми, димәде, киресенчә, тырыш, дип канатландырып торды, - дип елмаеп куйды.

Күңелен көрәшкә биргән кыз башкаларны да хәзер спортка гашыйк итә. Тренажер залында фитнес инструкторы булып эшли. Эштән тыш вакыты келәмдә үтә.

- Көрәш беренче чиратта минем холкымны үзгәртте. Көрәшеп, күп нәрсә узасың, имгәнүләр дә булды... Ул - минем тормыш мәгънәсе. Без гомер буе нәрсә беләндер көрәшәбез бит. Көрәш миңа кызыклы тормыш, дуслар, яңа мөмкинлекләр бүләк итте. Көрәшеп, Россиянең, дөньяның нинди генә ноктасында булмадым мин, - ди батыр кыз.

«Алтыннар җиңел генә бирелми»
Татарстанның иң көчле көрәшчеләренең берсе - Раил Нургалиевнең чемпионатта бишенче - юбилей җиңүе бу. Ул 100 килограммга кадәр авырлыкта классик стильдә көрәште.

- Минем өчен иң авыр Дөнья чемпионаты 2013 елда Уфа шәһәрендә булды. Шундый зур күләмдә беренче ярышларым иде. Финал вакытында келәмгә быел да 2013 ел чемпионатында үзем җиңгән казах егете белән чыктым. Алдагы турларда гел җиңелеп килгәнгә, бу җиңү җиңел бирелмәде. Гомумән, кайда, кем белән көрәшүеңә карамастан, алтыннар җиңел генә бирелми. Көндәшең дә келәмгә җиңү өмете белән чыга бит. Аннан соң, бер ялгышлык та җиңүеңне тартып алырга мөмкин, - ди Раил.

Быелгы чемпионатта ул Казахстаннан ике, Кыргызстаннан бер егет белән көрәшә. Билбау көрәше буенча үз юлын тапкан илләр бу.

Җиңүләргә батырны улының, хатынының аның өчен җан атып торулары илһамландыра икән.

- Спортчы тормышында бар да яхшы икән, ул бар вакытын яраткан эшенә багышлый ала. Бүген минем барысы да Аллага шөкер: яраткан хатыным, улым яңадан-яңа җиңүләргә этәргеч биреп тора, - ди Раил.

Буш вакытларын да гаиләсенә багышларга тырыша ил батыры. Көрәштән тыш, футбол белән дә шөгыльләнергә вакыт таба әле ул. «Берсе-берсенә комачауламый», - дип елмая көрәшче.

- Безнең футбол командасы да республика буенча өченче урында тора. Шуңа соңгы вакытта футболга күбрәк тә игътибар бирергә туры килә әле, - ди Раил.

«Келәмгә чыккач, дулкынлану онытыла»
Габдеҗәлил Сөләймановны без 2013 елда Казанда узган Бөтендөнья Универсиада ярышларыннан беләбез. Ул вакытта егет көмеш медаль яулаган иде. Габдеҗәлил дүрт ел рәттән инде үз авырлыгында (62 кг) Дөнья чемпионы титулына ия була. Егет көрәш белән 14 яшеннән үк профессиональ рәвештә шөгыльләнә. Көрәштән башка юлны күз алдына да китерми. Гаиләләре белән көрәшәләр бит алар. Әтисе Бари Сөләйманов - танылган тренер. Абыйсы Рифкат тә кайчандыр бу вазифаны башкарган.

Габдеҗәлил дә финалда чемпионатны кабул итүче ил көрәшчесе белән бил алыша.

- Иң авыры - психологик киртәне җиңү. Ә келәмгә чыккач, дулкынлану онытыла. Ничек бар - шулай көрәшәсең. Бу мизгелдә барысы да синнән генә тора икәнен аңлыйсың. Ярдәм итүче дә, киңәш бирүче дә булмый. Мин үземдә икеләтә зур җаваплылык тойдым бу ярышларда. Беренчедән, ил данын якларга кирәк, икенчедән, келәм читендә бер хәрәкәтемне дә күздән ычкындырмый әтием карап тора. Аны да якын кешем, тренерым буларак сынатасы килми. Башкалар тренировкадан соң өйләренә кайтып ял итә. Ә минем өйдә дә - спорт режимы. Бу җиңүгә әти дә күп көч куйды, - ди көрәшче.

Бүген Габдеҗәлил дә әтисе юлыннан киткән. Үзе укыган Идел буе физик культура, спорт һәм туризм академиясендә тренер булып эшли. Параллель рәвештә аспирантурада да белем ала. Көрәшче Сөләймановлар гаиләсе Алексеевск халкына да яхшы таныш. Районда көрәшне үстерүгә зур өлеш керткән кешеләр алар. Габдеҗәлилнең Универсиададагы җиңүеннән соң, районда көрәш белән шөгыльләнү өчен, махсус комплекс калкып чыкты.

Язмага реакция белдерегез

0

0

0

0

0

Реакция язылган инде

Комментарийлар

Мөһим

loading