«Рубин» сөендермәде

Казанның «Рубин» футбол клубы 18 мартта Россия чемпионатының 35 туры кысаларында Краснодарда җирле «Кубань» белән очрашты. Соңгы биш матчның берсен дә җиңеп карамаган Казан уенчылары бу юлы 1:0 исәбе белән оттырып кайтты. Бердәнбер голны 43 минутта Маркос Пизелли кертте.
Клуб өчен тагын бер күңелсез хәбәр: Россия футбол союзы (РФС) Казанда уеннар үткәрүне тыйды. Бу уңайдан, «Рубин» - «Локомотив» Россия кубогы матчы 21 мартта Грозныйда «Әхмәт-Арена»да үткәреләчәк.