Шәһри Казан

Фирданияне ник диңгезгә ыргытканнар?

Фирдания Анисимова «Позис» заводында эшли. 18 яшеннән заводта. Элекке заманнар булса, чын пролетариат вәкиле дияр идең.

Кулындагы чүкече белән һәйкәл итеп куярлык горур сын-кыяфәт үзендә.

- 1988 елда заводка килгәндә, унсигез яшем дә тулмаган иде әле. Нигәдер миңа остаз да билгеләмәделәр, - дип тәүге эш көннәрен хәтерендә яңарта ул. - Диңгезгә ыргыткандай, станок янында калдырдылар да киттеләр.

Күз курка, ә кул эшли, диләр бит. Авыр минутларында кычкырып елардай булса да, түзгән. Эш арасында механика техникумын тәмамларга да өлгергән.
- Тырыштым-тырмаштым, артка чигенмәдем. Хәзер инде үзем - өлгеләр әзерләү цехында өлкән мастер. Курыкмагыз, булдырам, дип максат куеп эшләгез, дип киңәш бирәм яшь эшчеләргә, - ди әңгәмәдәшем.

Реклама

Эшче үзен түгел, ә коралын һәм эшен мактар, диләр бит. Ул да шулай.

- Кайбер кешеләр чит илләрдә ясалган җиһазларга чат ябыша. Белсеннәр: безнең суыткычлар - дөньяда иң сыйфатлысы, алар еллар дәвамында сынатмаячаклар. Детальләрне ясаучыларның, суыткычларны җыючыларның күбесе - хатын-кызлар. Шуңа күрә дә инде без - хуҗабикәләр, суыткычларны ватылмаслык итеп җыярга тырышабыз, - ди.

Яшел Үзәндә ясалган суыткычлардан файдаланганда, әлеге җиһазларга Фирдания кебек тагын йөзләгән хатын-кызларның хезмәте кергәнлеген искәрербез моннан соң.

Нравится
Поделиться:
Реклама
Комментарии (0)
Осталось символов: