Шәһри Казан

Хәния Фәрхинең кызы Алия: «Мин әнине көннәр, атналар, айлар буе да көтә идем»

Узган шимбәдә Татарстанның һәм Башкортстанның халык артисты Хәния Фәрхине соңгы юлга озаттылар. Җырчы Казанның Яңа Татар бистәсе зиратына җирләнде.

Реклама

Бу көннәрдә бөтен дөнья Хәния турында гына сөйләде дисәң дә, арттыру булмас. Дистәләгән шигырь язылды, тамашачылар, дуслары, сәхнәдәшләре хатирәләре белән уртаклашты. «Татарның танылган җырчысы Хәния Фәрхи вафат булды» дип, эре федераль басмалар язып чыкты. Шимбә көнне татарның моңлы сандугачы белән хушлашырга иҗат әһелләре, җитәкчеләр, сәясәтчеләр һәм җырчының яраткан тамашачысы килгән иде. Ул көнне Галиәсгар Камал театры бинасы янына халык җырчысын соңгы юлга озатырга дип өч меңнән артык кеше җыелды. Хушлашу чарасы башта бина эчендә, соңыннан, халык бик күп булу сәбәпле, теләгән бөтен кеше дә кереп бетә алмаганлыктан, урамда узды.

Хәния Фәрхинең кызы Алия җырчыны соңгы юлга озатырга килгән кешеләрнең барчасына да рәхмәтен белдерде.

- Әнием исеменнән, барыгызга да рәхмәт җиткерәм, - диде ул. - Мин тугач та, әни гастрольләргә чыгып киткән. Йөрәге ничек түзгәндер. Әни гомер буе түзем булды. Мине дә түзем булырга өйрәтте. Мин аны көннәр, атналар, айлар буе да көтә идем. Бүген әни шул гастрольләрнең берсенә генә китте, ләкин мәңгегә... - диде ул.
Яңа Татар бистәсе зиратында җырчылар да күп иде. Алар арасында Салават Фәтхетдинов, Хәмдүнә Тимергалиева, Венера Ганиева, Фирдүс Тямаев, Рифат Зарипов, Илназ Баһ һәм башкалар булды. Фирдүс Тямаев «Татар-информ» хәбәрчесенә Хәния Фәрхинең үзенең иҗат юлында киңәшләре белән еш булышуын әйтте.

- Бу - татар халкы өчен зур югалту. Без аның җырлары белән үстек, тәрбияләндек. Минем карьерамда да киңәшләре белән ул зур роль уйнады. Мин генә түгел, минем гаиләм дә аңа чиксез рәхмәтле, - диде ул.

Җомга көнне җырчы белән туган ягында Башкортстанда да хушлаштылар. Анда да халык бик күп җыелган иде. Яраткан җырчысын соңгы юлга озатырга килгән һәркем әлеге кайгыны үзләренеке кебек кабул итүләре турында әйтте.

Роберт МИҢНУЛЛИН

Газизебез Хәния Фәрхинең вафатына

Нинди авыр җәй булды бу?
Бу соң нинди ел инде?..
Гомер буе җырладың син...
Хәзер үзең җыр инде!

Син моңлы җырга әйләндең,
Җырның да үлемсезе...
Килешми сиңа, Хәния,
Килешми «үлем» сүзе.

Син яшәрсең күңелләрдә,
Яшәрсең җырларыңда.
Кузгатырсың күңелләрнең
Иң нечкә кылларын да...

Чибәрлегең - күз алдында,
Моңнарың - күңелләрдә...
Ничекләр генә түзәрбез
Моңнарың түгелгәндә?!

Нравится
Поделиться:
Реклама
Комментарии (0)
Реклама
  • 17 май 2018 - 11:28
    Өй салуның ние бар? - 2
  • Дәүләт Советы сессиясеннән ФОТОРЕПОРТАЖ 25.05.2018
  • Кремль яр буенда узган «Соңгы кыңгырау» бәйрәменнән ФОТОРЕПОРТАЖ
  • Соңгы кыңгыраулар чыңлар вакыт җитте
  • Хәйрия концертыннан ФОТОРЕПОРТАЖ
  • «Үлемсез полк» маршында 165 меңнән артык кеше катнашты
  • Казанның Меньеллык мәйданында узган Җиңү парадыннан ФОТОРЕПОРТАЖ
  • Суга сикерү буенча дөнья сериясе. Казан. 2018-FINA
  • 1 май митингыннан ФОТОРЕПОРТАЖ
  • Тукайга багышланган шигырь бәйрәменнән ФОТОРЕПОРТАЖ
  • Тукай премиясен тапшыру тантанасыннан ФОТОРЕПОРТАЖ
Соңгы комментарийлар
Интервью
  • 24 май 2018 - 16:56
    Рамазан ае уңаеннан бәйге башланды Татарстан Республикасы мөселманнары Диния нәзарәте "ТНВ" телеканалы белән берлектә Рамазан аена багышланган махсус бәйге игълан итте, диелә Татарстан мөселманнары Диния нәзарәте матбугат үзәге хәбәрендә.
    0
    0
    0
Ночной режим