Август аенда татарстанлылар яңа тарифлар буенча исәпләнгән счет-фактураларны кулга алачак.
«Татмедиа» басма һәм массакүләм коммуникацияләр буенча республика агентлыгында үткән матбугат конференциясендә ТР төзелеш, архитектура һәм торак-коммуналь хуҗалыгы министры урынбасары Алексей Фролов әйтүенчә, республикада торак-коммуналь хезмәтләр буенча тарифлар 6 проценттан артмаячак.
Тарифларның икенче яртыеллыкта үзгәреше федераль дәрәҗәдә хәл ителгән мәсьәлә. Тарифларны көйләүнең быелгы үзенчәлеге аның инфляция темпларына туры килүендә. Үсешнең беренче өлеше 1 июльгә каралган, икенче өлеше исә 1 сентябрьгә туры киләчәк. Гомумән алганда, торак хезмәтләре буенча тарифлар 4 процентка артачак, бу узган елгыдан шактый ким.
Белгәнебезчә, хәзер торак хезмәтләре һәм коммуналь хезмәтләр счет-фактурада аерым күрсәтелә башлады. «Күпләр бу тарифларның бер-берсеннән нәрсә белән аерылганын аңламыйлар. Тарифлар үзгәреше шартларында аңлашылмаучанлыклар килеп чыкмасын өчен, халыкка мөмкин кадәр күбрәк мәгълүмат бирергә, яктыртырга кирәк», - дип белдерде А.Фролов.
