Белгечләр чаң суга: Татарстан чигендә кош гриппы вирусы табылган!

Соңгы өч атна эчендә Татарстанга якын булган Россия төбәкләрендә йогышлы авыруның 60 очрагы ачыкланган: Самарада – 15, Пензада – 14, Курскта – 7, Саратовта - 4, Смоленскта – 3, Орловта – 6, Ростовта – 3, Түбән Новгород өлкәсендә  - 1 һәм Чувашия Республикасында – 7.

- Безнең өчен иң куркынычы – Чувашия Республикасы, чөнки бөтен яктан караганда да без алар белән бәйле. Биредә бер атна эчендә 50-60 баш кош-корт үлгән очраклар бар. Әлеге республикадан безгә бик күп кош-корт керә. Шуңа күрә кош гриппының Татарстанга да керү куркынычы зур, - диде     Татарстанның Министрлар кабинеты Баш ветеринария идарәсенең хайваннарда йогышлы авырулар һәм эпидемиягә каршы чаралар бүлеге җитәкчесе Александр Козлов.

Хәзерге вакытта белгечләр Чувашия Республикасына авыруның кайдан кергәнлеген ачыклый. Александр Козлов әйтүенчә, шушы көннәрдә Татарстанга авыру эләктергән 124 кг тарттырылган ит кергәнлеге ачыкланган. Алар сатудан алынган һәм юк ителгән.
- Гриппның инкубацион периоды – 21 көн. Әлеге өч атнада авыру билгеләре сизелми. Бу вакытта зарарланган продукция җитештерүгә яки сатуга китәргә мөмкин. Шуңа күрә теге яки бу төбәктән керә торган продукциянең сау-сәламәт булуында бернинди дә гарантия юк. Билгеле бер җирдә кош гриппы барлыгы ачыкланса, 21 көн эчендә кертелгән продукцияне тикшерә башлыйбыз. Әлеге чара Татарстанда йогышлы авыру таралмаска ярдәм итәр дип уйлыйбыз,  - диде Александр Козлов.
 
Казан ветеринария берләшмәсе мал табибы Булат Нуриәхмәтов әйтүенчә, әлеге продукцияны ачыкларга “Меркурий” системасы ярдәм иткән.
- Лаборатория тикшерүләре уңай нәтиҗәләр бирде. Инфекцияле ит республикага "Пензамолинвест" компаниясе аша кертелгән. Узган атна дәвамында без Пензадан килгән кош продукцияләрен кибет киштәләреннән, складлардан  алдык. Нәкъ менә “Меркурий” системасы безгә кайда, никадәрле күләмдә зарарлы продукция булганлыгын белергә ярдәм итте. Хәзер без Ростов өлкәсеннән килгән продукция белән шөгыльләнәбез. Монда халыкка борчылырга урын юк: имин булмаган төбәкләрдән керә торган продукция катгый күзәтү астында, - диде ул.  
Саклану чараларына килгәндә, әлегә безнең республикада карантин игълан ителмәгән, ә менә республика чигендә тикшерү постлары катгый эшли. Шулай ук, имин булмаган төбәкләрдән продукция сатып алынган очракта да, әлеге мәгълүматны яшереп калдырырга ярамый, моның өчен штраф каралган, дип кисәтә белгечләр.  

Кош гриппын булдырмый калу өчен:

- Кошчылык белән шөгыльләнә торган предприятиеләр барлык ветеринар кагыйдәләрне үтәргә тиеш;
- Ветеринар-озату документларсыз кош ризыклары сатып алмаска;
- Имин булмаган төбәкләрдән продукция сатып алмаска;
- Кош-корт сатып алгач, аны ун-унике көн аерым тотарга кирәк;
- Кош-корт алганда сатучыдан документларын таләп итәргә кыенсынмагыз. Кош-корт каян китерелгән, нинди фабрикадан, инкубатор хуҗасы кем, нинди күкәйдән чыккан, нинди вакциналар ясалган, нинди ветеринария эшкәртү процесслары узган?
- Шәхси хуҗалыклардагы һәм фермерларга кош-кортларын чыгарып йөртергә киңәш ителми;
- Халык арасында аңлату эшләрен алып барырга кирәк.
Кош гриппының беренче билгеләре
- Йокымсырау, кикрикләр зәңгәрләнү, кош-кортның йөреше үзгәрү, эче китү, температурасы күтәрелү һәм гырылдый башлау. Соң чиктә – үлем. Бүген бер чеби, өч көннән соң тагын берсе үләргә мөмкин. Йорт кошларының грипптан үлү ихтималы - 80-100 процент.
- Күп очракта авыру 1-7 көннәрдә беленә башлый. Алда саналган билгеләр кош-кортта беренче көндә үк күзәтелергә мөмкин. Ә бер атна дигәндә инде, кош-кортның яртысы үлеп бетә.