Казан Африка материгында яки Төркия кебек җылы климат зонасында урнашкан ил шәһәре түгел. Бездә көзге-кышкы чор 6 айны тәшкил итә.
Шәһәр башкарма комитетында булган киңәшмәдә мэр Илсур Метшин шәхсән үзе дә: «Шәһәр хуҗалыгы «әбиләр чуагы»на җайлашып эшләргә тиеш түгел. «Әбиләр чуагы» күптән бетте, кышка алдан ук хәстәрлек күрергә кирәк. Бу залда минем 1917 елдан бирле килүче көрәштәш дусларым юк. Җаваплылык тоеп эшләмәсәгез, вазифаларыгыздан азат итәм», - дип әйтергә мәҗбүр булды.
Сәбәбе бар: мэрның интернет-кабул итү сайтына казанлылардан җылылык булмауга зарланып шикаятьләр кергән.
Торак-коммуналь хуҗалык комитеты рәисе Искәндәр Гыйниятуллин, Казанда йортларга җылылык җибәрелде, дип инде өченче «эшлекле дүшәмбе»дә рапорт бирә. Ләкин, ни хикмәт, әлеге комитеттагы «кайнар элемтә» телефонына 3 мең кеше «җылы юк» дип шалтыраткан. Литвинов ур., 55 (Авиатөзелеш), Лобачевский ур., 4, Вишневский ур., 8/35, Шмидта ур., 37, Әбҗәлилов ур., 3 (Вахитов), Академик Парин ур., 6, Мәүлетов ур., 29, Фучик ур., 64 (Идел буе), Серов ур., 22 һәм 24, Восстание ур., 49, Воровский ур., 7, Блюхер ур., 4 һәм 9 (Мәскәү), Бондаренко ур., 33 (Яңа Савин), Седов ур., 5 (Совет), Горсовет ур., 17, Восход ур., 2 (Киров) йортларында әлегә кадәр җылылык юк яки җылы бирү ахыргача көйләнмәгән. Узган атнада 17 урында җылылык үткәргеч челтәре төзекләндерелгән. Ә 8 нче үткәргечтәге җитешсезлекне бетерү 2 тәүлеккә сузылган, шул сәбәпле 56 нчы квартал җылылыктан өзелеп торган. Сыртланова, Гарифҗанов, Мәүлетов һәм Парин урамнарындагы күпфатирлы 20 йортның бер атнага җылы судан мәхрүм калуы Гимнастика үзәге спорт бинасы төзелешенә бәйле.
Искәндәр Гыйниятуллин: «Йортларга җылылык бирүне бу атнада хәл итеп бетерәчәкбез, көйләү эшләре генә калды», - дип ышандырды. Моның үтәлүе шикле, чөнки җылылык ыгы-зыгысы ел саен кыш урталарына кадәр бара.
Киләсе атналарда да фатирларында бишмәт һәм киез итек киеп, җылылык булмаудан интегүчеләргә шәһәрнең торак-коммуналь хуҗалык комитетындагы «кайнар элемтә» телефоны: 292-21-02
