Кафил Әмиров вафат булу сәбәпле, Рөстәм Миңнеханов кайгы уртаклашты

“Хөрмәтле Нурия Шамил кызы! Тормыш иптәшегез Кафил Фәхрәзи улы Әмиров вафат булу сәбәпле, тирән кайгыгызны уртаклашам. Бу Сенең өчен авыр, республика өчен зур югалту.

Кафил Фәхрәзи улы үзенчәлекле, көчле шәхес, компетентлы җитәкче, тәҗрибәле хокук белгече, үзе шөгыльләнгән эшне инәсеннән-җебенә кадәр белүче иде. Унөч ел буе республика прокуроры, университетта мөгаллим һәм студентлар өчен остаз, фоторәссам һәм берничә китап авторы. Ул үзенең киңкырлы талантын республикага багышлады һәм Татарстан законнарын ныгыту һәм саклауга тиңдәшсез өлеш кертте”, — ди республика Президенты.

Экс-прокурор Татарстан халкының күңелендә мәңге сакланачак, дип ышана Татарстан Президенты. Ул Әмировның балаларына, туганнарына һәм якыннарына кайгы уртаклашу сүзләрен җиткерүне сорады.

“Нык булыгыз, шушы авыр көннәрдә көч һәм ныклылык телибез”, - диелә республика җитәкчелеге телеграммасында.