Медицина үзәгендә биткә иннек-кершән сөрткәннәр,..  һәм зур бурычка да батырып кайтарганнар

Роспотребнадзорның Татарстан буенча идарәсе җитәкчесе урынбасары Юлия Булатова кулланучыларны үзләренең хокукларын актив якларга чакырды “Татар-информ” мәгълүмат агентлыгында узган матбугат конференциясендә. Роспотребнадзор идарәсенә, аның районнардагы 12 бүлекчәсенә почта аша, электрон рәвештә хәбәр җибәрергә була. 

 — Халык шикаятьләре нигезендә азык-төлек продукциясеннән 217 проба алынды, шулардан 25 пробаның гына тиешле таләпләргә җавап биргәнлеге күренде. Күпчелек очракта азык-төлекнең сыйфаты тиешле дәрәҗәдә түгел яки товар тышлыгына язылган энергетика кыйммәте чынбарлыкка туры килми иде,-диде ул.

Казандагы “Витамед” медицина үзәге һәм “Зевс” җаваплылыгы чикләнгән җәмгыять кулланучылар хокуклары турында, гомумән, “оныткан”.
 — Битләренә косметика процедурасы ясатырга килгән гражданнарга “Витамед” хезмәткәрләре мәҗбүриләп диярлек кредит килешүе төзүне таккан. Татарстанлылардан 15 мөрәҗәгать керде, зыян күргән башка кешеләрдән дә хәбәрләр көтәбез. Безнең “Кайнар элемтә” телефоны: 8-917-224-87-94. Хәзер белгечләр “Витамед” медицина үзәгенә карата судка күмәк иск әзерли. “Зевс” җәмгыяте дә үзенең клиентларына йорт җиһазларын вакытында ясап җибәрмәгән,-диде Юлия Булатова.

Татарстанның Дәүләт алкоголь инспекциясенә узган ел республика халкыннан  2,5 мең мөрәҗәгать кергән. 
— Тикшерелгән 350 азык-төлек продукциясеннән 103 очрагында кимчелекләр табылды. Республикадан читтән китерелгән сөт продуктларында сыйфат кимчелекләре бар, шунлыктан куллану срогына һәм составына сак булу кирәк. Кешеләр сыйфатсыз товарларны сатып алмасыннар, “байкот” белдерсеннәр иде. Маркетплейс электрон сәүдә мәйданчыгына куелган товарларның фоторәсеме һәм мәгълүматы чынбарлыкка туры килүе мәҗбүри. Маркетплейска 1 марттан башлап канун таләбе көчәйтелде,-дип искәртте Татарстанның Дәүләт алкоголь инспекциясенең бүлек җитәкчесе Розалия Арсланова.

Казан шәһәре Башкарма комитетының торак сәясәте идарәсенең бүлек җитәкчесе Ринат Усманов кулланучыларга Торак сәясәте идарәсенең сайтына урнаштырылган мәгълүматлар белән дә танышып торырга киңәш итте.
 — Өлешле торак төзелешендә катнашучы кешеләр проект документлары, йортның кайчан тапшырылачагы турындагы мәгълүматлар белән танышырга хокуклы. Татарстан җитәкчелеге һәм муниципаль хакимият тырышлыгында Казанда проблемалы йортлар һәм алданган өлешчеләр мәсьәләсе уңай хәл ителде. Хәзер 57 төзелеш оешмасының эшчәнлеге күзәтчелектә тотыла, алар 89 торак йорт төзү белән мәшгуль, - диде Ринат Усманов. 

Автор фотосы