Туган көнең белән, беренче Президентыбыз!

Минтимер Шәймиев 1937 елның 20 гыйнварында хәзерге Актаныш районы Әнәк авылында крестьян гаиләсендә туа. Шәймиевнең бабасы - Шәймөхәммәт урта хәлле, таза тормышлы игенче булган. Коллективлаштыру елларында, кулак дип санап, ул йортыннан, мал-туарларыннан мәхрүм ителгән кеше. Ә әтисе - Шәһишәрип ага Шәймиев бөтен гомере буена авыл хуҗалыгында эшләп, шуның 26 елын колхоз рәисе буларак хезмәт иткән.

1954 елда Минтимер әфәнде мәктәпне тәмамлый һәм Казан авыл хуҗалыгы институтына укырга керә. Казан авыл хуҗалыгы институтының механикалаштыру факультетын тәмамлап, авыл хуҗалыгын механикалаштыру өлкәсендә эшли.

1969-1983 елларда - ТАССРның мелиорация һәм су хуҗалыгы министры.

1983 елда ТАССР Министрлар Советы Рәисенең беренче урынбасары була.

1983-1985 елларда - КПССның Татарстан өлкә комитеты секретаре.

1985-1989 елларда - ТАССР Министрлар Советы Рәисе.

1989-1990 елларда КПССның Татарстан өлкә комитеты беренче секретаре.

1990 елда ТАССР Югары Совет Рәисе итеп сайлана. Шул елда Татарстан Республикасының дәүләт суверенитеты турында Декларация кабул ителә.

1991 елның 12 июнендә Татарстан Республикасының беренче Президенты итеп сайлана. Татарстанның күп милләтле халкы республикада тынычлык һәм иминлекне ныгыту, катлаулы социаль-икътисадый проблемаларны хәл итү буенча М.Шәймиев тырышлыгына югары бәя бирә. Ике мәртәбә (1996 елның 24 мартында һәм 2001 елның 25 мартында) ул яңадан Татарстан Республикасы Президенты итеп сайлана.

1994-2001 елларда Россия Федерациясе Федераль Җыенының Федерация Советы әгъзасы. 2005 елның 25 мартында Россия Федерациясе Президенты В.В.Путин күрсәтмәсе буенча, Татарстан Республикасы Дәүләт Советы тарафыннан М.Ш.Шәймиевкә Татарстан Республикасы Президенты вәкаләтләре бирелә. Россия Федерациясе Дәүләт Советы әгъзасы (2000-2001 елларда - Дәүләт Советы Президиумы әгъзасы).

2001 елның 1 декабреннән "Бердәм Россия" партиясенең Югары Советы рәистәше.

М.Ш.Шәймиевнең ТР Республикасы Президенты вәкаләтләре чоры 2010 елның 25 мартында бетте. 2010 елның 21 апрелендә Татарстан Республикасы Дәүләт Киңәшчесе итеп билгеләп куелды. 2010 елның апреленнән "Татарстан Республикасы тарихи һәм мәдәни истәлекләрен торгызу республика фонды" коммерцияле булмаган оешмасының Попечительләр Советы Рәисе булып тора.

Россиянең Иҗтимагый телевидениесе Советы әгъзасы. Россия тарих җәмгыяте әгъзасы, Россия шахмат федерациясенең Попечительләр советы әгъзасы.

Без, "Шәһри Казан" газетасы иҗат коллективы да, Минтимер Шәрип улын туган көне белән котлыйбыз. Аңа ныклы сәламәтлек, озын гомер, эшендә зур уңышлар телибез.