Ярминкәгә Тарн-Варн фермерлары да килгән иде

Алексеевск районыннан килгән Александр Калинин мактый-мактый бал сата.
- Әтием Геннадий инде утыз еллап умартачылык белән шөгельләнә, соңгы җиде елда үзем дә булышам. Балның килограммын 250- 260 сумнан сатабыз. "Казан ярминкәсе" мәйданында узучы Россиякүләм умартачылар ярминкәләрендә дә катнашабыз. Республикада балны тапшыру урыны булсын иде,- ди яшь егет, өлкәннәрчә фикер йөртеп.

Буа шикәр заводының автокибете яныннан да кеше өзелми. Лилия Айзатуллина эреле-ваклы капчыкларны "очырта" гына. Буа шикәр комының килограммы - 45 сум.

- 1996 елдан терлекчелек эшенә керештек, ел саен 50-60 үгез алып үстерәбез. Ярминкәләргә һич иренмичә киләбез, юлга бензин өчен акчаны дәүләт бирә,- диделәр Аксубай районының Кыязлы авылыннан Әлфирә белән Рәис Шакировлар. Нурлат районының Төрнәле авылыннан Сергей Питуганов та: "Шәхси хуҗалыкта ел саен 25 үгез үстерәбез, алты сыер тотабыз",-ди. Сыер итенең килограммы 280-300 сумнан тәкъдим ителә. "Рацин-Шәле" җаваплылыгы чикләнгән җәмгыять сөтнең литрын 28 сумнан сата. Озын чиратка баскан әби-апалар: "Авыл сөте куе да, тәмле дә!"- дип, сатучы урынына үзләре мактап мәш киләләр.

Чираттагы чатырда сату итүчеләрнең кайдан булуларын сорадым.
- Тарн-Варннан.
- Каян-каян? Карлово-Варыдан?

Нурлат төбәгендә Тарн-Варн атамалы авыл, ә Нурлат шәһәренең үзендә шул исемдәге урам бар икән.

- Кайбер кешеләр: "Ял итәргә кая бардыгыз?", - дип сораганда, Тарн-Варнга бардык, Карлово-Вары кырыенда инде шунда, дип шаяртабыз. Ышаналар,- дип көлештеләр ирле-хатынлы Татьяна белән Александр Алексеевлар.

- Җәйге чорда 20-25 дуңгыз үстерәбез. Килограммын 240-250 сумнан сатабыз. Ярминкәләр оештырылуы бик әйбәт, балалар укый, аларга булышабыз, - диделәр Алексеевлар.

Чулман (Кама) аръягындагы районнар фермерларының күбесе Казандагы ярминкәгә төнге икедән үк юлга кузгала икән. Ару-талуларын сиздермичә, елмаеп сәүдә итәләр. Бәяләр дә 25 процентка арзан: бәрәңге - 12, кишер - 15, кәбестә - 12, суган 20 сум. Авыл хезмәтчәннәренә, агропредприятиеләргә рәхмәтнең иң зурысы. Казанда ярминкәләр май аена кадәр барачак.

Дамир Бәдриев фотолары