#Җәмгыять 14 сентября 2014, 12:10

Ышанычны акларбыз

14 сентября 2014, 12:10

Бүген, 14 сентябрь - бердәм сайлау көнендә Татарстаның Дәүләт Советына бишенче чакырылыш депутатларын сайлаулар бара. Бөтен республика буенча барлык сайлау участоклары да иртәнге сәгать җидедән алып кичке сәгать сигезгә кадәр эшли. Сайлаулар уздыру өчен республикада 65 территориаль сайлау комиссиясе, 2763 участок сайлау комиссиясе һәм вакытлыча булу урыннарында 51 сайлау участогы булдырылды. Татарстан Үзәк Сайлау комиссиясе мәгълүматлары буенча республикада барлыгы 2 млн 933 мең 720 сайлаучы бар. Сайлаулар өчен алты миллион сайлау бюллетене җитештерелде.

Скопировать ссылку

Татарстан Президенты Рөстәм Миңнеханов бүген Карл Маркс урамында КАИ бинасында урнашкан 42 нче номерлы сайлау участогында тавыш бирде. Президент тормыш иптәше Гөлсинә ханым белән урнага тавыш бирү бюллетеньнәрен салганнан соң:

- Халык сайлауларга килә. Сайлаулар бик оешкан төстә барыр дип ышанам. Нәтиҗәләрнең нинди булачагына килгәндә исә, анысы инде халыкның сәяси партиялләрнең һәм теге яки бу шәхеснең эшен ничек бәяләүләренә бәйле, - диде. Бүген сайлаулар барган көндә илдәге сәяси ситуациягә бәя биреп, Президент болай диде:

- Бүген ил бик оешкан төстә. Россия көчле, Россия кодрәтле, Россиянең үзенең мәнфәгатьләре бар. Халык җитәкчелек һәм илебез Президенты позициясен хуплый.

Сайлау участогыннан чыккан вакытта Президент Рөстәм Миңнехановның һәм аның тормыш иптәшенең беләзекләренә "Мин тавыш бирдем" дигән браслет кигезделәр. Тавыш биргән һәрбер кеше әлеге беләзек белән бүген көн дәвамында җәмәгать транспортында буйлай йөри ала, ә кичен "Казан Арена" да Россия йолдызлары катнашында булачак концертны карый алачак.

Татарстанның Үзәк сайлау комиссиясе рәисе Әгъзам Гобәйдулин 65 нче сайлау участогында беренчеләрдән булып диярлек тавыш бирде. Әгъзам Гобәйдуллин әйтүенчә, алдан тавыш бирүчеләр саны 350 мең кеше.

- Бүген 100 мандатка республикада 393 кандидат дәгъва кыла. Аларга бүген сайлаучылар бәя бирәчәк. Халык актив. Күңелләре күтәренке, - диде Үзәк сайлау комиссиясе рәисе. - Кичке сәгать сигездән иртәнгә кадәр сайлау участокларында тавышларны санау белән шөгыльләнәчәкләр. 16 сентябрьдә нәтиҗәләрне игълан итәчәкбез.

Татарстан Дәүләт Советы рәисе Фәрит Мөхәммәтшин сайлауларга канәгатьлек хисләре белән килүен әйтте.

- Халык белән ишегалларында, хезмәт коллективлары белән очрашу вакытында ике якның да ачыклыгы дәүләт власте белән халык арасындагы ышанычны ныгытты. Безгә ышаныч булачагына ышанам һәм без аны эшебез белән акларбыз, - диде Фәрит Мөхәммәтшин.

Татарстанның Дәүләт киңәшчесе Минтимер Шәймиев тормыш иптәше Сәкинә ханым белән 55 нче сайлау участогында тавыш бирде.

- Сайлау алды чорын бик кызыксынып күзәттем. Миңа дәүләт власте вәкилләренең һәм партия вәкилләренең халык белән очрашулар үткәрүе, халыкның ничек яшәве, нинди проблемаларны хәл итәргә кирәклеге белән кызыксынуы бик ышады. Күзгә күз очрашып сөйләшү үз нәтиҗәләрен бирә. Сайлаулар дустанә узар, халык үз сүзен әйтер дип ышанам, - диде Минтимер Шәймиев.

Кызыклы яңалыкларны күзәтеп бару өчен Вконтактега кушылыгыз.