Рифат Сәлах: "Әсәрне кем генә сәхнәләштерсә дә, спектакль буларак, тулысынча кабул итә алмыйм"

- Хәзерге вакытта төрек язучысы Хәлил Ибраһим Өздемирнең русчага тәрҗемә ителгән «За туманами» дигән повестен укыйм. Анда сүз бер ирнең, хатыны үлгәч, яңа хатынга өйләнеп, аңа ярарга теләп, үз балаларын кыерсытуы, хәтта берсен үлемгә кадәр җиткерүе турында бара. Шулай ук кул астында Әмирхан Еникинең сайланма әсәрләре бар. Ял иткәндә берничә битен укып куям. Телебезнең бөтен байлыгы Әмирхан Еники әсәрләрендә, минемчә.

Яраткан авторларым күп, әл­бәттә. Халкыбыз бу мәсьәләдә бик бәхетле! Марат Кәбировның китаплары бер сулышта укыла. Нәбирә апа Гыйматдинова, Рәмзия апа Габделхакова китаплары һәрвакыт мавыктыргыч.

Китапларны сатып та алгалыйм, ләкин өйдә бүләк ителгән китаплар күбрәк. Туган авылыма кайткан саен, балачакта игътибар ителмәгән китапларга күз атам. Иң истә калган китап дип Нәкый Исәнбәтнең пьесалар җыентыгын әйтер идем. «Хуҗа Насретдин» әсәрен утыз-кырык мәр­тәбә укыганмындыр. Хәтта дусларым белән шул әсәрдән мисаллар китереп сөйләшә идем. Шуңа күрә әлеге әсәрне кем генә сәхнәләштерсә дә, спектакль буларак, тулысынча кабул итә алмыйм. Ниндидер кечкенә генә бер детале югалса да, кәефем китә, чөнки бу әсәр мөкәммәл, язма вариантында бер генә китеклек тә юк, миңа калса, - Рифат Сәлах, шагыйрь.