Энергетика тармагында кадрлар мәсьәләсе: Татарстанда 45 мең белгеч эшләячәк

Әлеге очрашу кысаларында республика рәисе Рөстәм Миңнеханов указы нигезендә гамәлгә куелган Электрон мактау тактасына кергән энергетикларны да тәбрик иттеләр. 

Татарстан энергетика тармагы — иң эре эш бирүчеләрнең берсе

«Татарстанның энергетика тармагы иң эре эш бирүчеләр. Хезмәт базарында 88 мең вакансия бар, шуның 8 меңнән артыгын энергопредприятиеләр тәкъдим итә. Бу „Татэнерго“, „Челтәр компаниясе“ һәм башка оешмалар», — диде республиканың Хезмәт, мәшгульлек һәм социаль яклау министры Эльмира Зарипова.

Министр сүзләренчә, энергетика тармагында 43 меңгә якын кеше эшли. Әлеге системаның үсешен исәпкә алып, 2032 елга кадәр эшләүчеләр саны 45 меңгә кадәр җитәчәк. «Безнең бүгенге очрашуыбыз юкка түгел. Яшь кадрларны әзерләү максатыннан мәгариф системасына нинди таләпләр куярга кирәген уртага салып сөйләштек. Энергетика тармагында яшь белгечләрне җәлеп итү юлларын табар өчен фикер алышырга җыелдык», — диде Зарипова.

Яшь белгечләрне әзерләү — төп бурыч

Казан дәүләт энергетика университеты ректоры Эдвард Абдуллаҗанов белдергәнчә, университет кысаларында 5 институт эшләп килә. 11 мең студент белем ала. Студентлар бар уңайлыклары булган 4 тулай торакта яши. Эльмира Зарипова әйтүенчә, энергетика өлкәсендә кадрларны алдан әзерләү максатыннан хәзердән үк чарасын күреп, кирәкле белгечлекләрне максатчан программа нигезендә укыту эшен системага салырга кирәк. Дөрес, бу алым инде бар, ләкин өметле кадрлар әзерләү ул — заман таләбе. 

Энергетика системасын модернизацияләү өчен квалификацияле кадрлар кирәк

Республиканың сәнәгать һәм сәүдә министры урынбасары Марат Минибаев ассызыклап узганча, Татарстанда энергетика системасына нигез салынуга быел 95 ел. «Энергия белән тәэмин итүнең ышанычлылыгы, челтәрләрне модернизацияләү, цифрлы чишелешләрне гамәлгә кертү — болар барысы да белгечләрнең квалификациясенә һәм энергетика тармагының кадрлар контурының тотрыклылыгына турыдан-туры бәйле. Энергетика компанияләренең эше халыкның көнкүрешенә дә йогынты ясый. Шуңа күрә компанияләрдә югары квалификацияле белгечләр белән тәэмин итү бик мөһим», — диде Марат Минибаев. 

Чара ахырында энергетика системасында эшләүче Электрон мактау тактасына кергән 26 хезмәткәргә махсус таныклык бирелде.