«Яңа фатир, ЕГРН һәм ипотека»: фатир алу буенча иң мөһим сорауларга җаваплар

Фатирга милек хокукын ачкычлар тапшырылгач кына рәсмиләштереп буламы? Күпбалалы гаиләләр өчен 450 мең сум субсидиягә гариза тутырганда кадастр номеры сорала — Домкликта күренгән электрон имзалы ЕГРН өземтәсе туры киләме? Шулай ук ипотеканы беренче айдан ук вакытыннан алда (частичное погашение) түләргә ярыймы?

Укучыбыздан килгән сорауга риэлтор Эльвира Шакирова аңлатма бирә:

Яңа төзелештәге фатир буенча милек хокукы йорт файдалануга тапшырылып, объект кадастр исәбенә куелгач кына рәсмиләштерелә. Гадәттә, фатир хуҗасы төзүче белән кабул итү-тапшыру актына кул куя һәм ачкычларны ала, нәкъ менә шул этаптан соң милекне теркәү мөмкин була.

Милек хокукын рәсмиләштерү өчен күп функцияле үзәк (МФЦ) аша мөрәҗәгать итәргә була. Үзең белән паспорт, өлешләп катнашу килешүе (ДДУ), кабул итү-тапшыру акты, кредит килешүе алып барырга һәм дәүләт пошлинасын түләргә кирәк. Документлар гадәттә 9–12 эш көне эчендә әзерләнә. Нәтиҗәдә фатирның төп документы — Бердәм дәүләт күчемсез милек реестрыннан (ЕГРН) өземтә бирелә.