Казанда юл-транспорт һәлакәтләре еш теркәлә торган урыннарны куркынычсызрак итәчәкләр

Бу хакта шәһәр җитәкчелегенең юл хәрәкәте иминлегенә багышланган киңәшмәсендә әйтелде.

Белгечләр фикеренчә, бүгенге көндә иң проблемалы урыннар арасында Островский – Пушкин, Чуйков – Бондаренко, Габишев – Кол Гали урамнары киселешләре, шулай ук халык арасында Танк боҗрасы дип йөртелгән транспорт чишелеше бар. Әлеге урыннарда юл-транспорт һәлакәтләре ешрак теркәлә, шуңа күрә аларда хәвефсезлекне арттыру буенча өстәмә чаралар күреләчәк.

Шәһәр хакимияте юллардагы һәлакәтләр санын киметү өчен инфраструктураны яңартуны дәвам итәчәк. Моңа светофорларның эш режимын камилләштерү, өстәмә юл билгеләре урнаштыру, тизлек режимына чикләүләр кертү, җәяүлеләр кичүләрен уңайлырак һәм хәвефсезрәк итү, шулай ук юл тамгаларының күренүчәнлеген яхшырту керә.

Казан мэры Илсур Метшин сүзләренә караганда, төп максат – аварияләр булганнан соң нәтиҗәләрен бетерү түгел, ә аларны мөмкин кадәр булдырмый калу.