#Җәмгыять 14 июль 2026, 14:18

Казанда хуҗасыз автомобильләр махсус мәйданчыкка озатыла

14 июль 2026, 14:18

Хуҗасыз автомобильләр турында “Халык контроле” системасы, “Госуслуги РТ” порталы яки “Моя Казань” чат-боты аша хәбәр бирергә мөмкин.

Скопировать ссылку

Казанда хуҗасыз автомобильләр махсус мәйданчыкка озатыла

Әгәр ташландык машина ярты елдан артык торса, ул махсус мәйданчыкка алып кителә. Казанда якын көннәрдә 30 автомобильне эвакуатор эләктерергә мөмкин. Автомобильне “хуҗасыз” дип тану тәртипләре законда күрсәтелгән. Башта белгечләр карау үткәрә. Машинаның тәгәрмәчләрендә һава чыгарылган, тәрәзәләре ватык, кузовы бәргәләнгән, детальләре сүтелгән булса, карау үткәргәнлек акты төзелә, автомобиль 6 айга махсус реестрга кертелә.

– Кайбер автомобильчеләр машиналарын кыш буена калдыра, командировкага китәләр яки автомобильдән файдаланмыйлар. Алты ай срок озак вакытка куеп калдырылган автомобильне “хуҗасыз” дип, ялгышлык белән алып китмәс өчен билгеләнә, – ди Авиатөзелеш һәм Яңа Савин районнары хакимиятенең төзекләндерү бүлеге җитәкчесе Нияз Сәлахетдинов.

Ярты ел вакыт эчендә хакимият автомобиль хуҗасын эзли, автомобильгә кисәтү игъланы беркетелә. Узган ел Авиатөзелеш һәм Яңа Савин районнарында яшәүчеләр “Автомобилегезне алып куегыз” дигән игъланнан соң, 200 машинаны рөхсәтле урыннарга күчереп урнаштырган яки сатып җибәргән. Махсус мәйданчыкка 27 машина алып кителгән.

Машина махсус мәйданчыкта 6 ай саклана. Хуҗасы табылган очракта, ул эвакуация чыгымнарын түләп, машинасын кире кайтара ала. Әгәр ярты елдан соң да хуҗасы табылмаса, район хакимияте судка мөрәҗәгать итә һәм суд карары нигезендә транспорт чарасы утильләштерелә.

Кызыклы яңалыкларны күзәтеп бару өчен безнең МАХ каналына кушылыгыз.