Миңнеханов «Динамо-Ак Барс» хатын-кызлар волейбол клубын чемпион титулы белән котлады

ТР Дәүләт Советының Мактаулы Рәисе, ТР Волейбол федерациясе президенты Фәрит Мөхәммәтшин, ТР Рәисе Аппараты җитәкчесе, ТР «Динамо» физкультура-спорт җәмгыяте рәисе Әсгать Сәфәров, «Динамо-Ак Барс» хатын-кызлар волейбол клубы президенты Леонид Барышев һәм команданың баш тренеры Зоран Терзич исемнәренә юлланган хөкүмәт телеграммасында республика җитәкчесе «Динамо-Ак Барс» клубының быелгы сезон фавориты һәм Татарстанның чын горурлыгы булуын билгеләп үтте.

«Барыгызны да хатын-кызлар командалары арасында волейбол буенча Россия чемпионатында лаеклы җиңүегез белән котлыйм. Сез дәрәҗәле турнир тарихында сигезенче алтын медаль яулап, мактаулы трофейны Казанга кире кайтара алдыгыз. «Динамо-Ак Барс» клубы – быелгы сезонның фавориты һәм Татарстанның чын горурлыгы. Сезгә нык сәламәтлек, яңа һөнәри үрләр һәм уңышлар телим», – диелә котлауда.