Мошенниклар телефонда дустың-туганың тавышы белән дә алдаларга мөмкин

Республикада ел башыннан 3 437 мошенниклык факты теркәлгән.

– Мошенниклар кармагына эләгүчеләрнең күпчелеген хатын-кызлар тәшкил итә. Уенда отыш алдыгыз, туганыгыз террорчылыкта гаепләнә, телевизордан туганыгызны күрсәтәләр, дигән сүзләргә шунда ук ышанып, мошенниклар кушкан эшләрне эшли башларга ярамый. Ата-аналар:”Хокук саклау органнарыннан, дип шалтыраткан очракларда да өйдәге сейфны ачмагыз”, – дип, балаларына аңлатсыннар. Хокук саклау органнары телефоннан өйдәге сейфны ачарга кушып шалтыратмый. Телефоныгызның сим-картасыннан билгесез адресларга акча күчерүләргә ризалык бирмәгез. Быел шундый дропперларга карата 55 җинаять эше кузгатылды инде. Үсмерләр акчага кызыгып, мошенникларның “курьер” вазифасын башкармасын, җинаять җаваплылыгына тартылачаклар. Финанс һәм милек эшләрен башкаруда үзеңә-үзең чикләү кертү (самозапрет) килешүе төзү мошенниклардан саклый, – диде Татарстан буенча Эчке эшләр министрлыгы вәкиле Рәдис Юсупов “Татар-информ” мәгълүмат агентлыгында үткәрелгән матбугат конференциясендә.

Татарстан Республикасы Прокуратурасының бүлек җитәкчесе Михаил Желаев әйткәнчә, мошенниклардан алдану очраклары кими бара. Ләкин, әле тынычланырга иртә. Татарстанның цифрлы үсеш министры урынбасары Альберт Яковлев сүзләренә караганда, республикада 680 мең 792 кеше “самозапрет” килешүе төзегән. Бу килешүне Дәүләт хезмәт күрсәтүләре порталында яки МФЦда башкарып була.

– Мошенниклар телефонда дустың-туганың тавышы белән дә сөйләшергә мөмкин. Алар:”Телефонымда акча бетте, сал әле”, – дип тә әйтәләр. Шалтыратып, акча салсаң, мәгълүматларыңа юл ачыла. Ашыктырып, туганнарың яки банк белән киңәшләшергә ирек бирмичә сөйлиләр икән, әңгәмәне дәвам итмәгез, телефонны сүндерегез. Банк картагызны югалтсагыз, кичекмәстән үзегезнең банкка хәбәр бирегез, – дип кисәтте “Ак Барс” банкының сатулар буенча офисы җитәкчесе Фәрид Хафизов.

Психолог Инна Идрисова компьютерда уйнап үсүче балаларның ата-анасы өчен “галим” булып күренсә дә, акыл ягыннан тормышка әле әзер түгеллеген искәртте.

– Бала сүзгә ышана, алдауның нәрсә икәнлеген белми. Шуның өчен дә балага компьютер уеннарында катнашуның хәвефле булуын, акча белән кызыктыруларга ышанмаска кирәклеген даими төшендерү зарур, – диде Инна Идрисова.

 

Кызыклы яңалыкларны күзәтеп бару өчен безнең МАХ каналына кушылыгыз. 

❮

❯