#Җәмгыять 13 апрель 2026, 13:02

“Музей кебек кухня кирәкме?”: кыйммәтле җиһаз артыннан куып, үзебезне чикләмибезме

13 апрель 2026, 13:02

Аш-су бүлмәсенә җиһаз сайлыйбыз. Шактый гына кибетләрне йөреп чыктык.

Скопировать ссылку

“Музей кебек кухня кирәкме?”: кыйммәтле җиһаз артыннан куып, үзебезне чикләмибезме

Аш-су бүлмәсенә җиһаз сайлыйбыз. Шактый гына кибетләрне йөреп чыктык.

Онлайн сату үзәкләрен дә айкадык. Юк, кирәклесен генә таба алмадык.

Безгә ошаганы бик кыйммәт. Очсызлысы очсыз дигәндәй, күңелгә ятышлысы барыбер табылмады. Әлеге дә баягы үзең эзләп табып, үзең планлаштырып җыя торган зур кибетләргә киттек. Шәт, уйлаган эшебезне очы шунда күренергә тиеш. Хәзер бит модульле аш-су бүлмәләре өчен җиһазлар да шактый сатыла. Алары бермә-бер арзанга төшә.

Җиһазны бит алганда гына ух-вах килеп аласың, аннан күз ияләшә. Бер 5 елдан яңага алмаштырасы килә башлый. Торган-торган шул җиһаз белән 15 еллап гомер итәсең. Аннан ремонт башлагач, төсе туры килми, ул арада җиһазың да искергән була. Бу – безнең гаилә тормышындагы төрле аш-су бүлмәсенә дүртенче җиһаз. Аларның хәзер дә һәркайсы үз урынында тора, ташланмадык.

Кайнанам да шул арада өченчесен алыштырды. Ул да чыгарып атмады. Кайсы сарайда хезмәт итә, кайсын верандага куйдык, артык әйберләрне шунда саклыйбыз. Банка, кәстрүл-табаклар, запас ризыклар да шунда тула. Хатын-кызга җиһаз булса, ул аны тутыру җаен таба белә. Әле җитми дә ул безгә.

Сүз башым шүрәле дигәндәй, һаман җиһаз сайлыйбыз. Акыл өйрәтүчеләр күп. Мондый алыгыз, тегендине. Заказ да ясатырга була. Ул акыл бездә дә бар, тик кесә ягы гына сайрак. Яши торган җиһазны да мәңгелеккә дип аласы килми. Заказга бик кыйммәт чыга. Әле уртак фикергә дә килеп бетәсе бар. Озын сүзнең кыскасы, без размерыбыз туры килгән модульле аш-су бүлмәсенә тукталдык. Әмма аңа кирәкле җиһазларны кыйммәтлерәкне сайладык. Коры тактаны өеп куеп кына булмый бит. Аннан төсе туры килми дип, тагын икенчесен уйладык. Карый торгач, кыйммәтлерәккә дә күзебез төштек. Тагы кире уйладык.

Шулай йөри торгач, каршыма иремнең элеккеге хезмәттәше килеп чыкты. “И, безнең кухня миллионга якын булды. Бөтен техника, суыткыч, эченә кереп утырды. Музей кебек йөрибез. Хәзер әле монысына кагылырга ярамый, әле тегесенә. Хатын шунда ук “замечание” ясый. И матур булды аш-су бүлмәсе! Музей инде музей. Безгә йөз ел хезмәт итәчәк. Тик мин дә аның кадәр үк яши алмам, – диде ул моңсу елмаеп. – Гадиерәкне алыгыз, 5-6 елдан алыштырырлык булсын. Рәхәтләнеп кулланыгыз”.

Без бер-беребезгә карап елмаеп куйдык. Үзебезнең әле дә озын-озакка җитәрлек аш-су бүлмәсе караганыбызны аңладык. Чыннан да, гадиерәк яшик әле, тормыш болай да катлаулы бит.

Кызыклы яңалыкларны күзәтеп бару өчен безнең МАХ каналына кушылыгыз.