Сабада Васил Гарифуллин исемендәге «Серле каләм» бәйгесе узды

Яшь буында әдәбиятка кызыксыну уяту, укучыларга һөнәр сайларга юнәлеш бирү һәм ярдәм итү, район җирлегендә яшь талантларны барлау бәйгенең төп максаты итеп куелган. 
 
— Әлбәттә, бу конкурста катнашкан һәрбер кеше профессиональ журналист булып китмәс. Ләкин сүз белән эшли белү, үзеңнең фикерләреңне башкаларга дөрес җиткерү бик мөһим, — диде Журналистика һәм медиакоммуникация югары мәктәбе деканы, Милли һәм глобаль медиа чаралары кафедрасы мөдире,  филология фәннәре докторы, профессор, Россия Федерациясенең атказанган югары мәктәп хезмәткәре, Татарстанның атказанган фән эшлеклесе Васил Гарифуллин. 

Бүләкләү тантанасында мөхтәрәм кунаклар Саба районы Яшьләр эшләре һәм спорт бүлеге җитәкчесе Азат Гатиятуллин, "Татмедиа" акционерлык җәмгыяте филиалы — "Саба дулкыннары" телерадиокомпаниясе директоры Әлфия Мөбәрәкова, "ТАТМЕДИА" АҖ "Саба-информ" филиалы җитәкчесе һәм баш мөхәррире Рөстәм Исмәгыйлов һәм "Яшьлек" яшьләр үзәге директоры Дилүс Закиров катнашты. 

Татарстан Журналистлар берлеге әгъзасы,  «Шәһри Казан» газетасының бүлек мөхәррире, жюри әгъзәсе Рәсимә Галиева катнашучыларның хаталарын да билгеләп үтте: 
— Интернеттан материал алмагыз. Бу тиз ачыклана. Материал зур булмаса да үз фикерегезне әйтегез. Үз фикерләре булган укучылар хәзерге вакытта бик кирәк, - диде ул. Шулай ук хезмәт темасына багышланган эшләрнең аеруча  уңышлы язылганнары  турында хәбәр итте. 

Килгән кунакларга кызыклы мастер-класс күрсәтелде. Җиңүчеләргә КФУ дипломнары һәм акчалата бүләк тапшырылды. Иң сөенечле мизгел бәйгедә Гран-при алучыны билгеләү. «Серле каләм 2026» конкурсының Гран-при иясе — Саба урта мәктәбендә укучы Әдилә Шафикова.

— Быел бәйгедә беренче тапкыр катнашам. Мәкаләне әтием, бабаем, карт бабаем турында яздым. Язганда киңәшләре белән әбием булышты. Җиңүемә чиксез шат! — дип хисләре белән уртаклашты Әдилә. Аңа киләчәктә дә зур уңышлар теләп калабыз.

Залинә Гыйләҗиева