“Татарстан нефтьгазхимия- 2025” форумы: Казанда килешенгән сүз, эш булып әверелә

– Татарстан Хөкүмәте теләктәшлегендә форум инде 30 ел үткәрелә. Пленар утырышта Татарстан Рәисе Рөстәм Миңнеханов, федераль хакимият органнары вәкилләре, чит илләр делегацияләре катнаша. Базарда төп рольне уйнаучы “Газпром”, “Газпром нефть”, “Татнефть” һәм башка акционерлык җәмгыятьләре үзләренең мөмкинлекләре белән таныштыра. Татарстанның сәнәгате куәтле, шунлыктан чит илләр предприятиеләре безнең белән хезмәттәшлеккә омтыла. Кабул ителгән килешүләр эш булып әверелеп, уңай нәтиҗәләр бирә. Форумның дәрәҗәсе елдан-ел үсә, шунлыктан анда катнашырга теләүчеләр саны да арта бара. Татарстан Фәннәр академиясе президенты Рифкать Миңнеханов белән берлектә форумның өченче көне “Яшьләр көне” шигарендә уза. Югары һәм урта уку йортлары студентлары, мәктәп укучылары предприятеләр һәм һөнәрләр белән танышачак, – диде Татарстан Премьер-министры урынбасары – сәнәгать һәм сәүдә министры Олег Коробченко “Татар-информ” мәгълүмат агентлыгында уздырылган матбугат конференциясендә.

Беррәттән нефть-газ-химия тармакларына багышланган халыкара күргәзмә дә оештырыла.
– БРИКС, ШОС, ЕАЭС һәм БДБ илләреннән 200 компания үзләренең экспонатларын куя. Җиңүнең 80 еллыгы уңаеннан тармак ветераннарына багышланган махсус экспозиция урнаштырыла. Хезмәт ярминкәсе дә үткәрелә, – диде “Казан Экспо” халыкара күргәзмәләр үзәге генераль директорының беренче урынбасары Игорь Астафьев.