Экстремаль субкультуралар һәм хәвефле мавыгулар балаларның имгәнүләренә, кайчакларда, үлеменә дә китерә.
Интернет уеннарын тормышта кабатларга ярамый. “Татар-информ” мәгълүмат агентлыгында шушы темага матбугат конференциясе үткәрелде.
– Республика мәктәпләрендә оештырылган тест күрсәткәнчә, 9,5 мең үсмер психологик яктан ярдәмгә мохтаҗ. Хәзерге интернет заманында шәһәр белән авыл баласы арасында аерма юк. Түбәдән сикерү, вагон өстенә менү, җир асты тоннельләрендә йөрү кебек хәвефле мавыгулар шәһәрдә дә һәм авылда да күзәтелә. Шәһәрләрдә күбрәк, әлбәттә. Бала бөтен нәрсә белән кызыксына бит ул, ахыры имгәнү яки үлем белән тәмамлану ихтималы турында уйлап җиткерми. Аңлату эшләре уку елы дәвамында алып барыла, инде каникулда балаларның җәйге сәламәтләндерү лагерьларында да дәвам иттерелә. Ата-аналар катнашында онлайн җыелышлар уздырабыз. Балалар ата-ана күзәтчелегеннән читтә калдырылмасын иде. Җәйге айларда балалар сулыкларга үзләре генә бармасын, – диде Татарстанның мәгариф һәм фән министры урынбасары Алсу Әсәдуллина.
Республиканың балигъ булмаганнар эшләре һәм аларны яклау буенча комиссиясенең җаваплы секретаре Илсөяр Гарифуллина әйткәнчә, 14 яшькә кадәрге бала хокук бозса, аның әти-әнисе административ җавапка тартыла.
– Сабый әле сөйләшә белми, ә телефоннан төрле уеннарны карап-уйнап бара. Без интернет заманында баланы яхшы белән хәвефне аера белергә өйрәтергә тиешбез. Быел балаларның тимер юллар тирәсендә тәртипсезлекләр эшләвенең 68 очрагы теркәлде, шуның 34 мисалы тимер юллар белән турыдан-туры бәйле. Җитди хокук бозуларда гаепләнелгән балалар, хөкем карары нигезендә махсус мәктәпләргә җибәреләләр, – дип кисәтте Илсөяр Гарифуллина.
Балалар “зацепинг”, “паркур”, диггерство”, “руфинг” кебек хәвефле гамәлләрне кабатлый.
– Поездлар вагоннары өстенә менү бик хәвефле, югары көчәнештәге электр тогы кешенең эчке органнарын да көйдереп ата, исән калу мөмкин түгел. Җир астындагы ташландык торбалар, шулай ук иске йорт-корылмалар эчендә йөргәндә сулыш юллары инфекцияләр эләктерә. Түбәдән-түбәгә яки аска сикерү дә хәвефле. Татарстанда җәй башыннан 6 бала түбәдән сикереп имгәнде. Балалар арасында аяк-кулларын сындыручылар, баш миенә зыян китерүчеләр бар. Түбәнең 2-3 метр биеклектә булганыннан сикергәндә дә каты имгәнү алырга мөмкин, – дип искәртте Республика балалар клиника хастаханәсенең амбулатор травмотология һәм ортопедия үзәге мөдире Ленар Дзюменко.
Кызыклы яңалыкларны күзәтеп бару өчен безнең МАХ каналына кушылыгыз.
Дамир Бәдриев
Комментарийлар