Төркиядәге татар Сабантуена меңнән артык ватандаш җыелды

Быелгы бәйрәмдә Төркиянең төрле төбәкләреннән килгән меңнән артык татар катнашты. Бу чара илдәге татар җәмәгатьчелегенең иң зур мәдәни вакыйгаларының берсе булып санала.

Кунаклар өчен бай концерт программасы әзерләнгән иде. Сәхнәдә Татарстанның атказанган артистлары Рәнис Габбазов, Зөлфәт Зиннуров, Татарстанның халык артисты Вәис Бәйрәмов, «Татар моңы» халыкара конкурсы лауреаты Гөлия Сәгыйева (Габбазова), шулай ук «Сәйдәш» бию ансамбле чыгыш ясады.

Сабантуйның төп бизәге булган милли уеннар да зур кызыксыну уятты. Катнашучылар капчык киеп йөгерүдә, аркан тартышуда, кашыкка йомырка салып йөгерүдә, күзләрне бәйләп чүлмәк ватуда һәм башка традицион ярышларда көч сынашты.

Бәйрәмдә милли ризыклардан авыз итү мөмкинлеге дә булды. Кунаклар өчен тематик мәйданчыклар һәм ял зоналары эшләде, милли рух һәм җылы аралашу мохите тудырылды.

Чара Татарстан Республикасы Мәдәният министрлыгы, Бөтендөнья татар конгрессы, Татарстан Республикасының Төркиядәге Тулы вәкаләтле вәкиллеге, «Татарстан» сәүдә йорты, Искешәһәр татарларының мәдәният һәм үзара ярдәм җәмгыяте ярдәмендә оештырылды.

Төркиядә ел саен үткәрелә торган Сабантуй чит илдә яшәүче татарларны берләштерүче, милли гореф-гадәтләрне саклаучы һәм киләсе буыннарга җиткерүче мөһим мәйданчык булып кала. Быел да бәйрәм татар мәдәниятенең байлыгын һәм милләтнең бердәмлеген тагын бер кат күрсәтте.

Татарстанның Төркиядәге сәүдә вәкиллеге

Кызыклы яңалыкларны күзәтеп бару өчен безнең МАХ каналына кушылыгыз. 

‹ ›

❮

❯