Укытучылар йөзе – «Ак Барс Арена» медиафасадында

Исемнәре данланган кешеләр арасында 3,6 меңгә якын педагог та бар. Бүген, 1 сентябрь – Белем көнендә, «Ак Барс Арена» стадионы медиафасадында шушы педагоглар һәм укытучылар фотосурәтләре төшерелгән ролик трансляциясе оештырылды.

15 мең кеше арасында – 3,6 меңе педагог

 «Электрон мактау тактасы» проектының максаты – үз хезмәте белән Татарстан үсешенә өлеш керткән кешеләрне җәмәгатьчелеккә таныту һәм аларның хезмәтен бәяләү.

gordost.tatar.ru сайтындагы электрон тактада 15 меңнән артык Татарстанлының исеме урын алган. Алар арасында табиблар, төзүчеләр, юлчылар, мәдәният хезмәткәрләре, авыл хуҗалыгы белгечләре һәм башка һөнәр ияләре бар. Шуларның араларында 3,6 меңгә якыны – мәгариф өлкәсендә хезмәт куючылар.

- «Электрон мактау тактасы»нда урын алганнар арасында һәр алтынчы кеше – мәгариф системасы вәкиле. Бүген без зур медиафасадта шәһәр һәм районнардагы, хәтта кечкенә авыл мәктәпләрендәге укытучыларның исемнәрен күрәбез. Кемдер иң заманча зур мәктәптә белем бирә, ә кемдер 15 кенә бала укыган авыл мәктәбендә хезмәт куя. Әмма аларның барысы да безнең киләчәгебезне булдыра, балаларның күңеленә юл сала, – ди Татарстан хезмәт, халыкны эш белән тәэмин итү һәм социаль яклау министры Эльмира Зарипова.

Аның сүзләренчә, бүген укытучы һөнәренең абруен үстерүгә аерым игътибар бирелә. Яшь педагогларга остаз билгеләү, 25 ел педагогик стажы булган хезмәткәрләргә Хезмәт ветераны исемен алу мөмкинлеге бирү кебек чаралар да шуны раслый.

Татарстанда укытучыларга ярдәм итүнең төбәк чаралары да киңәя. «Минем яңа укытучым», «Минем яңа тәрбиячем», «Минем яңа өстәмә белем бирү укытучысы» грантлары гамәлдә. Яшь белгечләргә торак арендалау өчен 20 мең сумга кадәр компенсация һәм торак сатып алуда 1 миллион сумга кадәр ярдәм каралган.

Бүген «Ак Барс Арена» медиафасадында бер-бер артлы күрсәтелгән укытучылар фотолары да – бу һөнәр ияләренә зур хөрмәт күрсәткече. Экрандагы һәр исем артында – еллар дәвамында җыелган тәҗрибә, меңләгән дәрес, укучыларның уңышлары, остазлык һәм, иң мөһиме, балаларга бирелгән күңел җылысы.

Хезмәтебезне бәялиләр

Электрон мактау тактасына кергән кешеләрнең берсе – Казан федераль университеты Филология һәм мәдәниятара коммуникация институтының татаристика һәм мәдәният белеме кафедрасы доценты Гөлназ Әкбарова.

– Электрон мактау тактасын булдыру – республикабыз өчен әһәмиятле вакыйга. Бу – Татарстан үсешенә өлеш керткән кешеләргә, аларның һөнәрләренә җәмәгатьчелек тарафыннан хөрмәт билгесе, – ди ул. – Мондый бәя үз һөнәреңнең әһәмиятен тану булып тора һәм алга таба да үсү өчен этәргеч бирә.

Иң мөһиме – үз эшеңне ярату

Бүген «Ак Барс Арена» медиафасадында Казанның 20нче гимназиясе физика укытучысы, методист, яшь укытучылар остазы Ольга Соловьева фотосы да күрсәтелде. Мәгариф өлкәсендә ул 2003 елдан бирле хезмәт куя, күпсанлы бәйгеләрдә җиңүләре белән мактана ала. Ул да үзенең «Мактау тактасы»нда булуын зур горурлык дип саный. 

Ольга Соловьеваның укытучы булып китүе очраклылык түгел. Ул кечкенәдән үк үзен шушы һөнәрдә генә күргән.

– Мин һәрвакыт укытучы буласымны белдем. Әнием дә укытучы. Аның эшчәнлеге миңа бик якын иде. Башта башлангыч сыйныф укытучысы булам дип хыялландым, бишенче сыйныфта математика, аннары тарих укытучысы булырга теләдем. Ә җиденче сыйныфта физика дәресләре башлангач, бу предметка бер күрүдә гашыйк булдым, – дип елмая ул.

Бүгенге балаларны үз предметың белән ничек кызыксындырырга, дигән сорауга, ул гади генә җавап бирде:

– Минемчә, шәхси үрнәк иң яхшысы. Балалар синең үз эшеңне чын күңелдән яратуыңны күрсә, алар да шуның белән кызыксына башлый.