Халык синоптигы көзнең кайчан киләчәген әйтте

Арча районы Ашытбаш авылында яшәүче халык синоптигы Рәис абый Шәкүров, быел көз иртә киләчәк, дип кисәтә.
– Моңа аптырарга да кирәкми. Яз да быел егерме көнгә иртәләде. Көзе дә иртәләр кебек. Агачларга игътибар иткән кеше аны үзе дә күрә. Быел агач яфраклары бик иртә саргайды. Инде коелалар да. 3 сентябрьгә каенның өч-дүрт яфрагы гына сары булыр иде. Көне булыр әле дип сузып, иркенәеп йөрергә кирәкми. Уңыш җирдә кала күрмәсен. Хәтерлим әле: мәктәптә укыганда кайбер елларны 5 октябрьләрдә үк җирне шыгырдатып катырып куя иде. Кулларны туңдыра-туңдыра кырдагы бәрәңгене чүпли идек. Күп вакыт бәрәңге кырда кала да иде, – ди ул.  

Рәис абый әйтүенчә, 17 августтан соң әле бер ун көн бик матур булачак, көннәр аязачак. “Сентябрь коры килә дип әйтеп булмый. Тоташ яңгыр да яумаячак. Чиратлашып киләчәк, өч көн аяз, өч көн яңгыр, биш көн кояшлы, биш көн болытлы булырга охшаган”, – ди халык синоптигы.