«39 елдан соң — беренче сыерчык оясы»: Мамадышта студентлар һәм интернатта яшәүчеләр бергә иҗат итте

Бу юлы очрашу гадәти концерт яки әңгәмә генә түгел, ә чын иҗади остаханәгә әверелде. Студентлар интернатта яшәүчеләр белән бергә сыерчык оялары ясау буенча мастер-класс үткәрде.

Бу идея очраклы тумаган. Интернат янындагы паркта агачлар күп, ә анда яшәүчеләр күптән инде табигатьне кошлар тавышы белән «җанландырырга» хыяллана.

Инициатива белән Артур Афанасьев чыкты. Аның буе нибары 110 сантиметр, әмма ул гаять талантлы: җырлый, рәсем ясый, алмаз мозаикасы белән шөгыльләнә. Бу юлы ул тагын бер хыялын тормышка ашырды — 39 ел эчендә беренче тапкыр үз куллары белән сыерчык оясы ясады.

Аның үрнәген күреп, башкалар да кушылды — интернатта яшәүче өлкәннәр дә, студентлар да.

Очрашу барышында һәркем үзенә ошаган шөгыль тапты:

• берәүләр сыерчык оялары ясады

• икенчеләре музыка коралларында уйнады

• кемдер җылы аралашу белән шөгыльләнде

Тере музыка һәм ихлас аралашу чарага аеруча җылы атмосфера өстәде.

Мамадыш политехник көллияте каршында эшләүче «Яхшылык салаваты» волонтерлык хәрәкәте мондый акцияләрне даими үткәрә. Студентлар педагоглар белән бергә СВО зонасындагы хәрбиләргә дә ярдәм итә: иске мотоциклларны ремонтлыйлар, пироглар пешерәләр, мендәрләр тегәләр, хәтта мич-буржуйкалар да ясыйлар.

Бу юлы да алар бер тапкырлык акция белән генә чикләнмәячәкләрен әйтте — интернатны даими рәвештә шефлыкка алырга ниятлиләр.

 Кечкенә генә яхшылык та кемнеңдер хыялын чынга ашырырга мөмкин.

Гөлназ Кадыйрова,
Мамадыш