“Авыл ипотекасы аркасында бер районда халык саны кими, икенчесендә киресенчә арта”

"Авыл территорияләрен комплекслы үстерү" дәүләт программасын финанслау узган ел 3 миллиард сум тәшкил иткән. Быел федераль бюджеттан 3,7 миллиард сумга лимит каралган. Төбәк һәм җирле бюджетлар чараларын, бюджеттан тыш чыганакларны исәпкә алып, финанслауның гомуми күләме – 5 миллиард сум. 

– Узган ел белән чагыштырганда, 2 миллиардка күбрәк. Бу өлештә Татарстан ил буенча дәүләт программасы чараларын иң күп күләмдә алучы, – диде Татарстан авыл хуҗалыгы һәм азык-төлек министрының беренче урынбасары Ленар Гарипов Дәүләт Советында узган Экология, табигатьтән файдалану, агросәнәгать һәм азык-төлек сәясәте комитеты утырышында.

Быел программа нигезендә республиканың 52 гаиләсенә 3,8 мең квадрат метр торак сафка бастыру, 16,7 чакрым – су, 8,9 чакрым газ белән тәэмин итү челтәре сузу, 11 объектка бара торган 44 чакрым машина юлын норматив хәлгә китерү, авыл клубын һәм балалар бакчасын ремонтлау, мәктәп, яшьләр үзәге төзү һәм башкалар планлаштырыла.   

Сүз уңаеннан, 2020 елдан бирле «Авыл территорияләрен комплекслы үстерү» программасының төп инструментларының берсе буларак, ташламалы “Авыл ипотекасы” программасы гамәлгә ашырыла.

 «Россельхозбанк»ның Татарстан төбәк филиалы директоры Ләлә Кудерметова билгеләп үткәнчә, үткән елны “Авыл ипотекасы” нигезендә 1 меңнән артык кеше торак шартларын яхшырткан, моның өчен барысы 4 милилард сум акча бирелгән. 

Дүрт ел эчендә исә Татарстанда 4200дән артык гаилә 11 миллиард сум күләмендә ярдәм алган. Росреестры белешмәләренә караганда, “Авыл ипотекасы” Лаеш, Питрәч һәм Биектау районнарында аеруча популяр булган.

Таһир Һадиев та шуңа игътибар итеп, үз районнарын калдырып, шәһәргә якын районнарга күчеп киләләр, шуның белән без проблеманы хәл итмибез, киресенчә тудырабыз гына, диде.