Марат Җәббаров: “Товарны бер кулга чикле күләмдә бирү дефицит белән бәйле түгел”

Шикәр белән бәйле шау-шуны министр ясалма рәвештә барлыкка килгән ажиотаж дип бәяли. 
– Безнең эре логистик үзәкләре бар. Аларда товарлар җитәрлек. Ә сәүдә челтәрләренең складлары алай зур түгел. Складка бер көнлек товар китерелеп тора. Әмма аларны киштәләрдән гел бушатып торгач, тарату үзәкләреннән товарны складка китереп өлгертә алмыйлар. Шунлыктан ажиотаж барлыкка килә. Ярминкәләргә гадәттә 20 тонна шикәр китерелә иде. Узган атнада анда 100 тонна шикәр сатылды. Башка товарларга, шул ук онга ажиотаж күзәтелмәде, – диде Марат Җәббаров.   

Узган ел республикада 170 мең тонна шикәр җитештерелгән. Халык ел дәвамында якынча 100 мең тонна шикәр куллана икән. Димәк, запас җитәрлек. Бу узган коры елдагы уңыш күләме генә әле. Алдагы елларда шикәр бездә 300 мең тонна җитештерелә торган булган.
Тозга да дефицит булмаячак, ул Россиянең үзендә җитештерелә. 

Бәяләрнең күтәрелүенә килгәндә, аның сәбәбе продукциянең үзкыйммәте артуында. Үзебезнең продукцияне җитештерүдә чит илләрдән кайтарылган компонентлар кулланылганлыктан ул. Әйтик, төрү материалы. Ансыз гына сөтне сатып булмый. 
– Җитештерүчеләр кирәкле компонентларны сатып алу өчен альтернатив базарларны өйрәнәләр. БДБ, Төркия кебек дустанә илләр бар. Җитештерүчеләр хәзер безгә җитми торган материалларны актив эзли башладылар, – ди министр.  
Спекуляция булмасын өчен, товарны бер кулга билгеле бер күләмдә генә бирелүен дә ассызыклап үтте ул. Аның сүзләренчә, бу дефицит бәйле түгел.

Фото: http://buinsk-tat.ru